नेपाललाई पराजित गर्दै भारत बन्यो च्याम्पियन
काठमाडौं। घरेलु टोली नेपाललाई पराजित गर्दै भारतले काभा वुमन्स नेसन्स भलिबल लिगको उपाधि जितेको छ। योसँगै लिग चरणमा बेहोरेको हारको बदला लिन भारत सफल भएको छ।
भारतले लिग चरणमा ३-२ को सेटमा हार बेहोरेको थियो। बुधबार उक्त सेटलाई उल्टाउँदै भारतले २-३ को सेटमा जित निकाल्दै बदला पूरा गरेको हो।
त्रिपुरेश्वरस्थित राष्ट्रिय खेलकुद परिषद् (राखेप) कभर्डहलमा बुधबार भएको फाइनल खेल नेपालमा पहिलो सेट २५-२३ ले आफ्नो पक्षमा पारेको थियो। निकै प्रतिस्पर्धात्मक बनेको उक्त सेटको सुरुआतमै नेपाल ३-० ले पछि परेको थियो। तर, भारतले लगातार चार अंक जोड्दै पुनरागमन गर्यो। यद्यपि, अन्त्यतिर २०-२३ ले पछि परेको अवस्थामा नेपालले लगातार पाँच अंक जोड्दै सेट आफ्नो पक्षमा पारेको थियो।
दोस्रो सेटमा भने नेपालले फितलो प्रदर्शन गर्यो। नेपालले एक समय ५-१० को स्थितिमा थियो। तर, नेपालले थप ६ अंक जोड्दा भारतले भने १४ अंक हासिल गर्यो। यद्यपि, भारतलाई २४ अंकमा रोक्दै नेपालले लगातार चार अंक जोडेको थियो। तर, १० अंकमा पछि परिसकेको अवस्थामा नेपालले पुनरागमन गर्न सकेन र दोस्रो सेट १४-२५ ले गुमायो।
तेस्रो सेटमा चुनौतीको सामना गरे पनि नेपालले सुरुआतदेखि नै अग्रता लिएको थियो । उक्त सेट नेपालले २५-२२ ले आफ्नो पक्षमा पार्यो। चौथो सेटमा केही चुनौती पेस गरे पनि नेपालले २१-२५ ले नतिजा सुम्पियो। पाँचौं तथा अन्तिम सेटमा भने नेपालको प्रदर्शन निकै कमजोर रह्यो। र, ५-१५ ले भारत जित हासिल गर्न सफल बन्यो।
