प्रेमलाई हान्मदाङमा रजत

काठमाडौं। १३ औं दक्षिण एसियाली खेलकुद (साग) का कांस्य पदक विजेता प्रेमबहादुर लिम्बुले विश्व तेक्वान्दो हान्मदाङमा रजत पदक जितेका छन्। दक्षिण कोरियाको मुङइयोङमा सम्पन्न प्रतियोगितामा प्रेमबहादुरले व्यक्तिगत पुम्से विधामा रजत पदक जितेका हुन्।

उनका प्रशिक्षक जगन अधिकारीले प्रेम फाइनलमा मेक्सिकोका योन सियोकसँग ७.८९९–८.०९९ को झिनो अन्तरले पराजित हुन पुगे। त्यस अघि प्रेमले पहिलो खेलमा अमेरिकाका माइकललाई ८–७ अङ्कले हराएका थिए। दोस्रो खेलमा पनि प्रेमले दक्षिण कोरियाका ट्याइलरलाई ८.१६६ – ७.६८३ अङ्कले हराउँदै क्वाटरफाइनलमा  पुगे।

प्रेमले क्वाटरफाइनलमा एलेक्सिसलाई ७.७४९–७.१४९ अङ्कले र सेमिफाइनलमा जोवनलाई ७.९६६–७.७६६ अङ्कले हराउँदै स्वर्ण पदकको भिडन्त तय गरेका थिए।

तर, फाइनलमा भने उनी झिनो अन्तरले पराजित भएपछि रजत पदकमा नै सीमित भए।  कुल ५५ राष्ट्रका चार हजार पाँच सय खेलाडीले उक्त च्याम्पियनसिपमा प्रतिस्पर्धा गरेका थिए। यस अघि प्रेमले दक्षिण कोरियाको सङ्नाममा सम्पन्न खुला अन्तर्राष्ट्रिय सङ्नाम तेक्वान्दो प्रतियोगितामा पनि रजत पदक जितेका थिए।

नेपालका कोरियन प्रशिक्षक योङदल क्वानले पनि प्रशिक्षण पाएका प्रेमले विभिन्न अन्तर्राष्ट्रिय प्रतियोगितामा एक दर्जनभन्दा धेरै पदक जितेका छन्।

२०७३ देखि नेपाल पुलिस क्लबमा आबद्ध हुँदै तेक्वान्दो खेल्दै आएका प्रेमले आठौँ, नवौं राष्ट्रिय खेलकुदमा स्वर्ण पदक र १९औं एसियन गेममा पाँचौँ कांस्य पदक जितेका थिए। एसियाली तेक्वान्दो हान्मदाङ च्याम्पियनसिप र इन्डोनेसियामा कास्य पदक, माफिया अन्तर्राष्ट्रिय च्याम्पियनसिप थाइल्यान्डमा स्वर्ण पदक, सिनसुङ विश्वविद्यालय दक्षिण कोरियामा स्वर्ण पदक र ११औं सेङनाम अन्तर्राष्ट्रिय तेक्वान्दो च्याम्पियनसिप रजत पदक प्रेमको नाममा छ।

२०२६ मा हुने २०औं एसियाली खेलकुदका लागि बन्द प्रशिक्षणमा रहेका प्रेमले तयारी पनि गरिरहेका छन्। उनी आगामी तीन अगस्टमा नेपाल फर्कने कार्यक्रम रहेको छ।