जिम्न्याष्टिक कोर्स मंगलबारदेखि

काठमाडौं। नेपाल जिम्न्याष्टिक संघको आयोजनामा फाउन्डेसन अफ जिम्न्याष्टिक कोर्स मंगलबारदेखि सुरु हुने भएको छ । प्रशिक्षकका लागि लक्षित कोर्समा नेपालसहित आठ राष्ट्रका २४ जनाको सहभागिता रहने आयोजक संघका महासचिव मुकुन्दराज शर्माले जनाएका छन् ।

कोर्समा नेपालबाट सर्वाधिक १३ जनाको सहभागिता रहने संघका सदस्य पर्मेश्वर जोशीले जानकारी दिए । बंगलादेश, श्रीलंका, इरान र फिलिपिन्सबाट समान २–२ जनाले भाग लिने छन् । न्युजिलेन्ड, भारत र मलेसियाबाट समान १–१ जना सहभागी हुने छन् ।

अन्तर्राष्ट्रिय जिम्न्याष्टिक महासंघ र एसियाली जिम्न्याष्टिक युनियनको सहयोगमा हुन लागेको कोर्स भक्तपुरमा पाँच दिनसम्म चल्ने छ । विज्ञहरु ब्राजिलका मार्को एन्टोनियो, जापानका अराकी तात्सु र अस्ट्रेलियाकी क्याट्रिनाले सहभागीलाई प्रशिक्षण दिने छन् ।