एरिका र स्यान्टु उत्कृष्ट

काठमाडौं। नेपाल ओलम्पिक कमिटीको आयोजनामा भएको एनओसी अवार्ड २०२४ मा करातेकी एरिका गुरुङ र टेबल टेनिसका स्यान्टु श्रेष्ठ उत्कृष्ट चयन भएका छन् ।

आइतबार आयोजित विशेष कार्यक्रमबीच एरिकालाई उत्कृष्ट महिला खेलाडी र स्यान्टुलाई उत्कृष्ट पुरुष खेलाडीको अवार्ड प्रदान गरिएको हो । एरिकाले चीनको हाङचाउमा भएको एसियाली खेलकुदमा रजत पदक जितेकी थिइन् । यस्तै स्यान्टु यसै वर्ष पेरिसमा हुने ओलम्पिकमा छनोट भएका थिए ।

उत्कृष्ट प्रशिक्षकमध्ये पुरुषमा कराँतेका कुशल श्रेष्ठ र महिलामा कपर्दीकी पार्वती राई घोषित भए । कुशल हाङचाउ एसियाली खेलकुदमा एरिकाका प्रशिक्षक थिए । यस्तै पार्वती त्यही हाङचाउ एसियाली खेलकुदमा महिला कपर्दीतर्फ कांस्य पदक विजेता टिमका प्रशिक्षक थिइन् । यस्तै पारा एथलेटिको अवार्ड भने तेक्वान्दोकी पलेशा गोवर्थधने पाइन् । उनले हाङचाउ पारा एसियाली खेलकुदमा कांस्य पदक जितेकी थिइन् भने पेरिसमा हुने पारालिम्पकमा पनि छनोट भएकी थिइन् ।

पत्रकारिता अवार्डतर्फ प्रिन्टमा ध्रुव तुलाधर, अनलाइन मिडियामा नवीन लुइटेल, स्पोर्टस फोटो जर्नलिस्टमा उज्वल डंगोल र स्पोर्टस भिडियो जर्नलिस्टमा प्रदीप लेखी उत्कृष्ट घोषित भए । विजेता खेलाडी, प्रशिक्षक तथा संचारकर्मीलाई अवार्डसहित जनही ५० हजार रुपैंया पनि प्रदान गरिएको थियो ।

नेपाल भलिबल संघ भने वर्ष २०२४ को उत्कृष्ट संघ घोषित भयो । यस्तै ‘प्रेसिडेन्टल रिकगनेसन’ भने अखिल नेपाल कपर्दी संघ, नेपाल कराँते महासंघ, नेपाल तेक्वान्दो संघ र पर्वतारोही तथा आर्चरी खेलाडी पासाङ भोटेलाई प्रदान गरियो । कार्यक्रम ओलम्पिक डेका अवसरमा आयोजना भएको हो ।