काठमाडौं। ट्वान्टी–२० विश्वकपअन्तर्गत बिहीबार सम्पन्न खेलमा अस्ट्रेलियाले ३९ रनले जित हासिल गरेपनि ग्लेन म्याक्सवेल लयमा फर्किन सकेनन्।
गुयानामा भएको खेलमा पहिले ब्याटिङ गरेको अस्ट्रेलियाले २० ओभरमा पाँच विकेट गुमाएर १६४ रन बनाएको थियो। जवाफमा ओमानले २० ओभरमा नवौ विकेट गुमाएर १२५ रन मात्र बनाउन सक्यो।
यो खेलमा ग्लेन म्याक्सवेल खाता नखोल्दै पेभिलियन फर्किए। उनलाई मेहरान खानले पहिलो बलमा आकिब इलियासको हातमा क्याच आउट गराए।
इन्डियन प्रिमियर लिग (आईपीएल) २०२४ मा पनि म्याक्सवेल धेरै पटक गोल्डेन डकको सिकार बनेका थिए। आईपीएलको १७ औं सिजनमा उनी चार पटक शून्यमा आउट भए। रोयल च्यालेन्जर्स बैंगलोर (आरसीबी)का लागि उनले १० खेलमा ५२ रन मात्र बनाए। यसबाहेक ६ विकेट लिए।
आईपीएलबाट लय गुमाएका उनले ट्वान्टी–२० विश्वकपमा सानदार पुनरागमन गर्ने अपेक्षा गरिएको थियो। तर, बिहीबार ओमानविरुद्धको खेलमा शून्यमा आउट भएसँगै उनी सबैभन्दा बढी गोल्डेन डक हुने सूचीमा चौथो स्थानमा पुगेका छन्।
ट्वान्टी–२० क्रिकेटमा उनी ३३ औँ पटक खाता नखोली नै पेभिलियन फर्किएका छन्। यो सूचीमा वेस्ट इन्डिजका सुनिल नारायण पहिलो स्थानमा छन्। उनी ४४ पटक गोल्डेन डकको सिकार बनेका छन्। एलेक्स हेल्स ४३, राशिद खान ४२ र पोल स्टलिंग ३२ पटक शून्यमा आउट भएका छन्।
