सिन्दिरा आठ वर्षपछि च्याम्पियन

काठमाडौं । सिन्दिरा जोशीले दसौं चरणमा शान्ति धिमाललाई पराजित गर्दै बुधबार एक खेल बाँकी छंदै नवौं नेसनल चेस च्याम्पियनसिप २०२४ मा महिलातर्फको उपाधि जितेकी छन् । दोस्रोपल्ट च्याम्पियन भएकी उनले राष्ट्रिय बुद्धिचालको उपाधि आठ वर्षयता पहिलोपल्ट कब्जा गरी हुन् ।

च्याम्पियनसिपको पाँचौं दिन सिन्दिराले अंशु दिन प्रजापतिलाई पराजित गरेपछि १६७२ रेटिङकी शान्तिविरुद्ध पूर्ण एक अंक जोड्दै दोस्रोपल्ट उपाधि पक्का गरेकी हुन् । उनले यससँगै मोनालिशा खम्बू र सुजना लोहनीले बनाएको दुई उपाधिको कीर्तिमान पनि बराबरी गरेकी छन् ।

उत्कृष्ट १२ खेलाडी सहभागि च्याम्प्यिनसिपमा अन्तिम तथा ११ औं चरणको खेल विहीबार हुनेछ । यसमा १६८५ रेटिङकी सिन्दिराले १० मध्ये नौ खेल जित्दै नौ अंक बनाएर उपाधि निश्चित गरेकी हुन् । उनले एकमात्र हार विनिता कपालीसँग पाँचौं चरणमा बेहोरेकी थिइन् ।

उपाधि होडमा चुनौती दिइरहेकी शान्तिलाई पराजित गरेपछि ४१ वर्षीया सिन्दिराले उपाधि सुरक्षित गरेकी हुन् । शान्ति दोस्रो हारसँगै ७ अंकमा रोकिएपछि उपाधि होडबाट बाहिरिदै चौथो स्थानमा पुगेकी छन् ।

सिन्दिराले अन्तिम चरणमा कृतिसरा अधिकारीसँग प्रतिस्पर्धा गर्नेछिन् । यस च्याम्पियनसिपका शीर्ष चार महिला खेलाडी सेप्टैम्बरमा हंगेरीमा हुने ४५ औं चेस ओलम्पियाडमा छनोट हुनेछन् । यसमा पूजा भण्डारी र कृतिसरा समान ७.५ अंकसहित शीर्ष चारमा छन् । यी दुईले आठौं चरणमा आमनेसामने हुँदा अंक बाँडेका थिए ।

राजन उपाधिनजिक
झापाली १९५९ रेटिङका खेलाडी राजन सुवेदी १० खेलमा ७ अंक बनाउँदै पुरुषतर्फ शीर्षस्थानमा यथावत् रहे । झापाकै प्रकाशचन्द्र नेपालसँग दसौं चरणमा बराबरी गरेपनि एकल अग्रता लिएपछि उपाधिनजिक पुगेका हुन् ।

३५ वर्षीय राजनले प्रकाशसँग अंक बाँड्नुअघि बुधबार सुशील चौधरीलाई पराजित गरेका थिए । उनलाई पछ्याइरहेका पुरुषोत्तम सिलवाललाई दसौं चरणमा सुरोज महर्जनले स्तब्ध पार्दै पूर्ण एक अंक जोडे । सुश्रुत दाहाल र क्षितीज भण्डारीले बराबरी नतिजा निकाले । यससँगै यी दुईको समान ६.५ अंक भएको छ । पुरुषोत्तम ६ अंकमा सीमित रहे ।

सुरुआती चार चरणमा ०.५ अंकमात्रै जोडेका रुपेश जैयसवाल प्रकाशचन्द्र र प्रेमकृष्णलाई पराजित गर्दै ६ अंक बनाए । तर, डिफेन्डिङ च्याम्पियन उनलाई अन्तिम खेलमा सुरोजसँग पूरा अंक जोड्नसके पनि त्यो उापधि रक्षा गर्न पर्याप्त हुने छैन । प्रकाशचन्द्रको पनि ६ अंक रहेको छ ।

राजनले अन्तिम चरणमा विहीबार ४९ वर्षीय प्रेमकृष्ण महर्जनसँग प्रतिस्पर्धा गर्नेछन् । प्रेमकृष्णले ३.५ अंक जोडेका छन् । पुरुषतर्फ शीर्ष तीन खेलाडीले ४५ औं चेस ओलम्पियाडमा स्थान पाउनेछन् ।