काठमाडौं। आइसिसी ट्वान्टी–२० विश्वकपको डेब्यू खेलमै युगान्डा पराजित भएको छ। मंगलबार बिहान सम्पन्न खेलमा युगान्डा टेस्ट राष्ट्र अफगानिस्तानसँग १२५ रनले पराजित भएको हो।
अफगानिस्तानले दिएको १८४ रनको लक्ष्य पछ्याएको युगान्डाले १६ ओभरमा सबै विकेट गुमाउँदै ५८ रन मात्रै बनाउन सक्यो।
युगान्डाका रोबिन्सन ओबुयाले सर्वाधिक १४ रन बनाए। २५ बल खेलेका उनले एक छक्का प्रहार गरे। रियाजत अली शाहले ११ रन बनाए। अन्य खेलाडीले दोहोरो अंकमा रन बटुल्न सकेनन्।
अफगानिस्तानका फजलहक फारुकी खानले सर्वाधिक ५ विकेट लिए। चार ओभर बलिङ गरेका उनले नौ रन खर्चिए। नवीन उल हक र राशिद खानलर् समान दुई विकेट लिए। मुजीब उर रहमानको नाममा एक विकेट रह्यो।
त्यसअघि प्रोभिडेन्स स्टेडियम, गुयानामा टस हारेर पहिला ब्याटिङ थालेको अफगानिस्तानले निर्धारित २० ओभरमा पाँच विकेट गुमाउँदै १८३ रन बनाएको थियो।
रहमानउल्लाह गुरबाजले सर्वाधिक ७६ रन बनाए। ४५ बल खेलेका उनले चार चौका र चार छक्का प्रहार गरे। इब्राहिम जाद्रानले ४६ बलमा नवौ चौका र एक छक्का प्रहार गरे।
मोहम्मद नबी १४ र कप्तान राशिद खान २ रनमा अविजित रहे। युगान्डाका ब्रायन मसाबा र कोस्मास क्याभुटाले समान दुई विकेट लिए। मुनर इस्माइलको नाममा एक विकेट रह्यो।
