युईएफए 'टिम अफ दि इयर' मा रोनाल्डो र मेस्सी पर्दा नेयमार अटाएनन्

एजेन्सी । युनियन अफ युरोपियन फुटबल एसोसिएसन (युएईएफए) ले सन् २०१८ को 'टिम अफ दि इयर' सार्वजनिक गरेको छ ।

विश्व भरमा फुटबल समर्थकको भोटको आधारमा युईएफएले 'टिम अफ दि इयर' को घोषणा गरेको हो । युएईएफले बर्ष टिमका लागि आएको १ लाख १५ हजार ४४० मतको आधारमा टिम छनोट गरेको हो । बर्ष टिमका लागि युरोपियन क्लब फुटबल र राष्ट्रिय टोलीबाट गरेको प्रदर्शनलाई आधार बनाईएको थियो ।

टिममा स्पेनिस ला लिगा, इंग्लिश प्रिमियर लिग र फ्रेन्च लिग वानका खेलाडीहरु अटाएका छन् । जसमा सर्वाधिक धेरै रियल मड्रिडका खेलाडी रहेका छन् ।

टिमको गोलकिपरमा बार्सिलोनाका टेर स्टेगान रहेका छन् । यस्तै डिफेन्डरमा रियलका कप्तान सर्जियो रामोस, लिभरपुलका भिर्जिल भान डिक, रियलका राफायल भराने र रियलकै मार्सेलो रहेका छन्  ।

त्यस्तै मिडफिल्डरमा चेल्सीका एन'गोलो कान्टे, रियलका लुका मोड्रिच र चेल्सीकै इडेन हाजार्ड रहेका छन्  ।

टिमको अग्र पंक्ति चर्चित स्ट्राइकर युभेन्ट्सका क्रिस्टियानो रोनाल्डो, बार्सिलोनाका लियोनल मेस्सी र पिएसजीका केलियन एमबाप्पेले सम्हाल्नेछन् । बर्ष टिममा पिएसजीकै चर्चित स्ट्राइकर नेयमार भने अटाएका छैनन् ।