काठमाडौं। बंगलादेशका अनुभवी अलराउन्डर शाकिब अल हसन सन् २०२६ को टी–२० विश्वकप खेल्नेमा आशावादी छन्।
तर, उनको ध्यान आइतबारदेखि शुरू भएको टी–२० विश्वकपमा राम्रो प्रदर्शन गर्नेमा केन्द्रित छ। शाकिब र भारतका कप्तान रोहित शर्माले मात्र टी–२० विश्वकपको प्रत्येक संस्करणमा खेलेका छन्।
यसअघि यो नै शकिबको अन्तिम विश्वकप रहको अनुमान गरिएको थियो। टी–२० विश्वकपमा उनले ३६ खेलमा ४७ विकेट लिएका छन्। उनले यसअघि सन् २०२५ को च्याम्पियन्स ट्रफीपछि सबै फर्म्याटबाट सन्न्यास को घोषणा गर्ने इच्छा व्यक्त गरेका थिए।
बीसीबीको फेसबुक पेजमा अपलोड गरिएको भिडियोमा शाकिबले भनेका छन्, ‘पहिलो, जब मैले क्रिकेट सुरु गरें तब मैले सोचेको थिइनँ कि म यति लामो समयसम्म खेल्नेछु। दोस्रो, म र रोहित शर्माले टी–२० क्रिकेट विश्वकप सुरु भएदेखि नै सबै संस्करणमा भाग लिइसकेका छौं। यो मेरो लागि गर्वको विषय हो र म देशको प्रतिनिधित्व गर्न पाएकोमा खुसी छु। म अर्को विश्वकप खेल्न सक्छु भन्नेमा मलाई आशा छ। त्योभन्दा पहिले म प्रतियोगितामा राम्रो प्रदर्शन गर्न चाहन्छु।’
बंगलादेश पछिलो समय खराब फर्म रहेको छ। अमेरिकासँग २-१ ले शृंखला हारेको बंगलादेश टी-२० विश्वकपमार्फत भने पुनरागमन गर्ने लक्ष्यमा हुने छ। शाकिब अमेरिकाको विकेट आफूलाई सुहाउँदो रहेको बताउँछन्। यो उनको घरेलु पिचसँग मिल्दोजुल्दो छ।
‘अमेरिका मेरो दोस्रो घर हो। यसअघि वेस्ट इन्डिज र अमेरिकामा खेल्दा हामीले राम्रो प्रदर्शन गरेका थियौं। फ्लोरिडामा पनि हामीले राम्रो प्रदर्शन गर्यौं। यसमा राम्रो प्रदर्शन हुनुको मुख्य कारण भनेकै यहाँको र हाम्रो घरेलु पिच मिल्दोजुल्दो हुनु हो,’ उनले भने।
बंगलादेशले आफ्नो दोस्रो अभ्यास खेलमा शनिबार भारतसँग प्रतिस्पर्धा गर्नेछ। यस्तै, जुन ८ मा डलासमा श्रीलंकाविरुद्ध खेल्दै विश्वकपको यात्रा शुरू गर्ने छ।
