काठमाडौं । नेपाली राष्ट्रिय फुटबल टिमका एक प्रमुख खेलाडी अनन्त तामाङले विश्वकप २०२६/एसियन कप २०२७ छनोटको अन्तिम खेलमा यमनलाई जसरी भए पनि हराउने लक्ष्यसहित प्रतिस्पर्धा गर्ने बताएका छन् ।
छनोटका अन्तिम दुई खेल (युएई र यमनविरुद्ध) को तयारीमा रहेका २६ वर्षीय सेन्टर–ब्याक अनन्तले भने, ‘अहिलेसम्म हामीले एउटा पनि खेल जित्न सकेको छैन । त्यसैले यो छनोटमा सकेसम्म दुई म्याच जित्ने हो । जित्न नसके पनि कसरी हुन्छ रिजल्ट आफ्नो पक्षमा पार्ने हो ।’
नेपालले फिफा वरीयतामा ६७ औं स्थानमा रहेको युएईविरुद्ध ६ जुन र यमनविरुद्ध ११ जुनमा खेल्दैछ । दुवै खेल साउदी अरेबियाको दमाममा हुनेछ । एएफसी (एसियाली फुटबल महासंघ) ले दशरथ रंगशालालाई अयोग्य ठहर गरेपछि अखिल नेपाल फुटबल संघ (एन्फा) कै प्रस्तावमा नेपाली टिमले युएईविरुद्धको ‘होम म्याच’ खाडी क्षेत्रमा खेल्न लागेको हो ।
नेपालले दुबईमा १६ नोभेम्बर, २०२३ मा भएको ‘अवे म्याच’ युएईले ४–० ले जितेको थियो । त्यसको पाँच दिनपछि दशरथ रंगशालामा भएको घरेलु खेलमा नेपाललाई दोस्रो हाफमा दुई गोल गर्दै यमनले २–० ले पन्छाएको थियो । फिफा वरीयतामा २२ स्थानमाथि रहेको युद्धग्रस्त यही देशको टिमविरुद्ध (यमन १५६ औं वरीयतामा) नेपालले यसपालिको छनोटमा अंक खोस्ने लक्ष्य राखेको छ । नेपालले बहराइनविरुद्ध ५–० र ३–० ले हारिसकेको छ ।
समूह ‘एच’मा चारै खेल हारेको नेपाली टिमको अन्तिम दुई प्रतिस्पर्धाको लक्ष्यबारे अनन्तले भने, ‘युएई एसियाली स्तरमा एक उत्कृष्ट टिम हो र उसले एसिया कपमा पनि एकदम राम्रो गरेको थियो । त्यसैले हामीलाई कठिन छ तर हामी आफ्नो शतप्रतिशत दिने हो ।’
यमनलाई रोक्न सकिन्छ त ?
‘हाम्रो मुख्य दबाब यमनसँगै छ,’ उनले थपे, ‘यमन हाम्रै स्तरको छ । उसलाई जसरी पनि हराउने लक्ष्य छ । युएईलाई बराबरी गर्ने छ । यो असम्भव भन्ने लाग्दैन मलाई ।’
अञ्जन विष्ट, समीर तामाङ, उत्सव राई, दिनेश हेन्जनलगात खेलाडी चोटका कारण बाहिरिएको अवस्थामा अनन्त बोले, ‘अञ्जन एक अनुभवी खेलाडी हुन् । उनको अभावले पछाडि पारेको छ । तर, टिममा उनलाई प्रतिस्थापन गर्न योग्य खेलाडी छन् । आयुष (घलान) फर्किएका छन् । उनको आगमनले विश्वकप छनोटमा हामीलाई राम्रो गर्छ ।’
उनीसँग गरिएको कुराकानी :
-1750047432.webp)
