काठमाडौँ। इन्डियन प्रिमियर लिग (आईपीएल) २०२४ धेरै हिसाबले रोचक बन्दै गएको छ। १७औँ सिजन शुरू हुनुअघि चेन्नई सुपर किंग्सका कप्तान महेन्द्र सिंह धोनीले आफ्नो पद ऋतुराज गायकवाडलाई हस्तान्तरण गरेका थिए। यो सिजन ऋतुराजले चेन्नईको कप्तानी सम्हाल्नेछन्।
यससँगै पुराना कप्तानको युगको अन्त्य भएको छ । यो पहिलो पटक हुनेछ जब विराट कोहली, रोहित शर्मा र धोनी एकसाथ टोलीको कमान्डिङबाट बाहिर रहने छन्। यस सिजन १० टोलीका १० कप्तानमध्ये ९ जना यस्ता छन्, जसलाई आफ्नो कप्तानीमा पहिलो आईपीएल उपाधि जिताउनुपर्ने जिम्मेवारी छ।
सन् २०२२ मा हार्दिक पाण्ड्याले गुजरात टाइटन्सलाई उपाधि दिलाएका थिए। बाँकीले खेलाडीको रूपमा उपाधि पक्कै जितेका छन्। तर, कप्तानी भूमिका सम्हालेपछि टोलीलाई उपाधि दिलाउन सकेका छैनन्।
यस सिजनमा तीन कप्तानले पहिलो पटक आईपीएलमा टिमको कमाण्ड गरिरहेका छन्। जसमा ऋतुराज (चेन्नई सुपर किंग्स), शुभमन गिल (गुजरात टाइटन्स) र प्याट कमिन्स (सनराईजर्स हैदराबाद) पर्छन्। बाँकी ७ जनासँग केही खेलमा कप्तानी गरेको अनुभव छ ।
यस सिजनको सबैभन्दा अनुभवी आईपीएल कप्तानको बारेमा कुरा गर्दा कोलकाता नाइट राइडर्सका श्रेयस अय्यर शीर्ष स्थानमा पर्छन्। उनीसँग यो लिगमा ५५ खेलमा कप्तानी गरेको अनुभव छ । कोलकाताअघि उनी दिल्ली क्यापिटल्सका कप्तान थिए।
सूचीको दोस्रो स्थानमा लखनऊ सुपर जायन्ट्सका केएल राहुल छन्। उनीसँग ५१ खेलमा कप्तानी गरेको अनुभव छ । यो सूचीमा राजस्थान रोयल्सका सञ्जु सामसन तेस्रो नम्बरमा छन्। उनले ४५ खेलमा कप्तानी गरेका छन्।
त्यसपछि सूचीमा मुम्बई इन्डियन्सका नयाँ कप्तान हार्दिक पाण्ड्या चौथो स्थानमा छन्। हार्दिकसँग आईपीएलमा ३१ खेलमा कप्तानी गरेको अनुभव छ । योसँगै दिल्ली क्यापिटल्सका ऋषभ पन्त ३० खेलको कप्तानी अनुभवका साथ पाँचौँ स्थानमा छन्।
रोयल च्यालेन्जर्स बैंग्लोरका फाफ डुप्लेसिस २७ खेलको कप्तानी अनुभवका साथ छैटौँ स्थानमा छन् भने पञ्जाब किंग्सका शिखर धवन सातौँ स्थानमा। उनले २२ खेलमा कप्तानी गरेका छन्। तर, यीमध्ये हार्दिकबाहेक अरू कसैले टोलीलाई उपाधि दिलाउन सकेका छैनन्।
उमेरका हिसाबले डुप्लेसिस सबैभन्दा अनुभवी कप्तान हुन्। उनी ३९ वर्षका छन्। ३८ वर्षीय धवन सूचीको दोस्रो स्थानमा छन्। ३१ वर्षीय राहुल तेस्रो, ३० वर्षीय कमिन्स चौथो र ३० वर्षीय हार्दिक पाँचौँ (कमिन्स एक दिन जेठो), २९ वर्षीय सामसन छैठौँ, २९ वर्षीय श्रेयस सातौँ (दिनको भिन्नता), २७ वर्षीय ऋतुराज आठौँ, २६ वर्षीय ऋषभ पन्त नवौँ र २४ वर्षीय शुभमन गिल दशौँमा छन्। अर्थात शुभमन यस सिजनका सबैभन्दा कान्छा कप्तान हुन्।
