काठमाडौँ। अनुज रावत र दिनेश कार्तिकले छैटौँ विकेटका लागि ९५ रनको साझेदारी गरेपछि रोयल च्यालेन्जर्स बैंग्लोरले इन्डियन प्रिमियर लिग (आईपीएल)मा साविक विजेता चेन्नईलाई १७४ रनको लक्ष्य दिएको छ।
एम चिदामबराम क्रिकेट स्टेडियममा टस जितेर पहिला ब्याटिङ थालेको बैंग्लोरले निर्धारित २० ओभरमा ६ विकेट गुमाउँदै १७३ रन बनाएको हो।
चेन्नईका लागि रावतले २५ बलमा ४ चौका र ३ छक्कासहित ४८ रन बनाए। कार्तिक भने २६ बलमा ३ चौका र २ छक्कासहित ३८ रन बनाउँदै अविजित रहे।
११.४ ओभरमा ५-७८ को स्थितिमा रहेको बैंग्लोरको इनिङ्स रावत र कार्तिकले ५० बलमा ९५ रनको साझेदारी गर्दै उकासेका थिए। रावत अन्तिम बलमा महेन्द्रसिंह धोनीबाट रन आउट भए।
पहिलो विकेटका लागि विराट कोहली र कप्तान फाफ डू प्लेसीले ४१ रनको साझेदारी गरेका थिए। तर, पाँचौँ ओभरको तेस्रो बलमा डिप फरवार्डमा डू प्लेसीलाई रचिन रविन्द्रले उत्कृष्ट ड्राइभ गर्दै क्याच आउट गराए।
सोही ओभरको अन्तिम बलमा रजत पाटिदार ३ बल खेल्दै विकेटकिपर महेन्द्रसिंह धोनीबाट कट बिहान्ड आउट भए। डू प्लेसी र रजत दुवैको विकेट मुस्ताफिजुर रहमानले लिएका हुन्।
छैटौँ ओभरको तेस्रो बलमा ग्लेन म्याक्सवेल अफ स्टम्प बाहिर खेल्ने क्रममा बिट हुँदा धोनीबाट आउट भए। उनी गोल्डेन डक भएका हुन्।
चौथो विकेटका लागि ओपनर विराट कोहली र क्यामरून ग्रिनबीच ३५ बलमा ३५ रनको साझेदारी भएको थियो। तर, १२औँ ओभरको दोस्रो बलमा रचिनले स्क्वायर लेगबाट दौडिएर विराटले प्रहार गरेको बल समाते।
विराटले २० बलमा १ छक्कासहित २१ रन बनाए। सोही ओभरको चौथो बलमा ग्रिन रहमानको बलमा बोल्ड भए। उनले २२ बलमा १ चौकासहित १८ रन बनाए। चेन्नईका मुस्ताफिजुर रहमानले सर्वाधिक ४ विकेट लिए।
४ ओभर बलिङ गरेका उनले २९ रन खर्चिए। दिपक चाहरको नाममा १ विकेट रह्यो।
