सावित्रा एक्लैको ५ गोल, नेपालको शानदार जित

काठमाडौं । सावित्रा भण्डारी चम्किएको खेलमा नेपालले वाफ वुमन्स च्याम्पियनसिप फुटबलमा शानदार जित निकालेको छ । 

बिहीबार सावित्रा एक्लैले ५ गोल गरेपछि समूह चरणको दोस्रो खेलमा नेपालले इराकमाथि ५–० को प्रभावशाली जित निकालेको हो । 

इराकविरुद्ध नेपालकी फरवार्ड सावित्राले उत्कृष्ट प्रर्दशन गरिन् । उनले नेपालको जितमा ५ गोल गरिन् । 

नेपालले पहिलो खेलमा सिरियालाई ४–१ गोल अन्तरले हराएको थियो । सो खेलमा समेत सावित्राले एक गोल गरेकी थिईन् । 

खेलको १३ औं मिनेटमा सावित्राले नेपाललाई सुरुवाती अग्रता दिलाएकी थिईन् । त्यसको दुई मिनेटमै सावित्राले नेपालको अग्रता दोब्बर पारिन् । खेलको ३६ औं मिनेटमा सावित्राले ह्याट्रिक गरेकी थिईन् । पहिलो हाफ सकिन एक मिनेट अघि उनले नेपालका लागि चौथों गोल गरिन् । 

दोस्रो हाफमा नेपालले गोलका पर्याप्त अवसर सिर्जना गरेपनि सफल हुन सकेन । खेलको ८० औं मिनेटमा गोल गर्दै सावित्राले नेपाललाई ५–० को शानदार जित दिलाईन् । 

जित सहित नेपाल सेमिफाइनल प्रवेशको नजिक छ । समूह बीमा रहेको नेपालले ६ अंक जोडेको छ । प्यालेस्टाईनको ३ अंक छ । सिरिया र इराक अंक विहीन छन् ।