नखिपोट बास्केटबलमा कीर्तिपुर ‘ए’ सफल

काठमाडौं । कीर्तिपुर ‘ए’ ले दोश्रो नखिपोट खुला बास्केटबल प्रतियोगिताको पुरुषमा सफलता हात पारेको छ ।

कीर्तिपुर ‘ए’ ले बौद्ध ‘बी’ लाई ८८–५३ ले पराजित गर्यो । 

विजयी टिमका लागि जयदीपले २८ अंक जोडे । कीर्तिपुरको ‘बी’ टिम भने चुक्यो । 

शंकरदेव क्याम्पसले कीर्तिपुर ‘बी’ लाई ७९–७५ को साँघुरो अन्तरले हरायो । शंकर देवका सोहिल श्रेष्ठले २३ स्कोर गरे ।

पुरुषमै क्वाटरफाइनलमा स्थान पक्का गरिसकेका नेपाल आर्मी र टाइम्सले पनि आ–आफ्नो प्रतिद्वन्द्वीमाथि जित निकाले ।

आर्मीले टाइमआउटलाई ९९–७७ ले पाखा लगायो । आर्मीका निकेश मगरले २८ अंक जोडे ।

टाइम्सले बलर्समाथि १२०–७६ को सहज जित दर्ता गर्यो । टाइम्सका विजय बुर्जाले ३६ अंक बटुले ।