काठमाडौं । विश्वकप फुटबलको एसियन छनोटमा नेपालले मंगलबार यमनविरुद्ध खेल्दैछ ।
नेपालले यमनसँग दोस्रो चरणको पहिलो लेगको खेल घरेलु मैदानमा खेल्न लागेको हो । काठमाडौंको त्रिपुरेश्वरस्थित दशरथ रंगशालामा हुने खेल साँझ ७ बजे सुरु हुनेछ ।
नेपालले दोस्रो चरणको यूएईविरुद्धको पहिलो लेगमा ४–० को हार ब्यहोरेको थियो । यूएईको घरेलु मैदानमा हार ब्यहोरेर घर फर्किएको नेपालले यमनविरुद्ध दशरथ रंगशालामा भिड्न लागेको हो ।
फिफा वरियताको १ सय ५६ औं स्थानमा रहेको यमनविरुद्ध नेपाल घरेलु मैदानमा अंक जोड्ने प्रयासमा हुनेछ । नेपाल फिफा वरियतामा १ सय ७३ औं स्थानमा छ ।
प्रि–म्याच कन्फरेन्समा प्रशिक्षक भिसेन्जो अल्बर्टो एनिसले यमनसँग खेल्दै गर्दा अंक जोड्ने नेपालको प्रयास हुने बताएका थिए ।
घरेलु मैदानमा यमनविरुद्ध उत्रदै गर्दा नेपाललाई समूहमा अंक जोड्ने राम्रो अवसर हो । तुलनात्मक रुपमा बलिया प्रतिद्धन्दी यूएई र यमन भन्दा यमनविरुद्ध नेपाललाई घरेलु मैदानमा केही सहज हुनेछ । त्यसको फाइदा घरेलु मैदानमा उठाउने योजनामा नेपाल छ ।
दशरथ रंगशालामा उत्रदै गर्दा नेपालको समस्या खेलाडीको चोटमा देखिन्छ । लाकेन लिम्बुले चोटका कारण यमनविरुद्धको खेल गुमाउने पक्का भएको छ । प्रशिक्षक एनिसले यमनविरुद्ध पूर्ण रुपमा फिट देखिएका खेलाडीलाई मात्र मौका दिने बताएका छन् ।
कप्तान किरणकुमार लिम्बुले घरेलु मैदानमा खेल्न हरेक खेलाडी उत्साहीत हुने गरेको तर्क गर्दै यमनविरुद्ध जितका लागि मैदान उत्रने बताए ।
दर्शकको सहजताका लागि खेल साँझ ७ बजे खेल राखेको छ । टिकट एन्फा आफैले रंगशालाबाट बेच्नेछ । टिकटको मुल्य ४ सय र १ हजार छ ।
पहिलो चरणमा लाओसलाई हराएर नेपाल दोस्रो चरणमा प्रवेश गरेको हो । दोस्रो चरणको समूह एचमा छिरेको नेपालले अरबका बलिया प्रतिद्धन्दी यूएई, बहराईन र यमनसँग दुई लेगको म्याच खेल्नेछ ।
