वेस्ट इन्डिजलाई सम्मानजनक लक्ष्य

काठमाडौं। नेपालले आईसीसी टी–२० पुरुष विश्वकपमा वेस्ट इन्डिजसामु १३४ रनको सम्मानजनक लक्ष्य प्रस्तुत गरेको छ।

मुम्बईस्थित वानखेडे रंगशालामा आइतबार टस हारेर पहिले ब्याटिङ गरेको नेपालले निर्धारित २० ओभरमा ८ विकेट गुमाउँदै १३३ रन बनायो।

सुरुदेखि नै दबाबमा परेको नेपालले ४.१ ओभरमै १७ रन बनाउँदा तीन विकेट गुमाएको थियो। त्यसपछि दीपेन्द्रसिंह ऐरीले इनिङ्स सम्हाल्ने प्रयास गरे। उनले गुलशन झासँग २७ रनको साझेदारी गरे भने पछि सोमपाल कामीसँग महत्त्वपूर्ण ५३ रनको साझेदारी गर्दै टोलीलाई सम्मानजनक योगफलतर्फ डोर्‍याए।

दीपेन्द्रले ४७ बलमा ३ चौका र ३ छक्का प्रहार गर्दै सर्वाधिक ५८ रन बनाए। सोमपाल २६ रनमा अविजित रहे। लोकेश बमले १३ तथा आसिफ शेख र गुलशन झाले समान ११/११ रन जोडे।

वेस्ट इन्डिजका जेसन होल्डरले ४ ओभरमा २७ रन खर्चिँदै सर्वाधिक ४ विकेट लिए। म्याथ्यु फोर्ड, अकील होसेन, शमर जोसेफ र रोस्टन चेजले समान एक–एक विकेट लिए।