काठमाडौं । पाकिस्तानी कप्तान बाबर आजमले पदबाट राजीनामा दिएका छन् । एकदिवसीय विश्वकप क्रिकेटमा पाकिस्तान समूह चरणबाट बाहिरिएसँगै बाबरले पदबाट राजीनामा दिएका हुन् ।
बाबरले तीनै ढाचाको क्रिकेटबाट कप्तानको रुपमा राजीनामा दिएको बताएका छन् ।
पाकिस्तानले सेमिफाइनलमा स्थान बनाउन नसकेपछि बाबरको राजीनामा आएको हो । उनको कप्तानीमा पाकिस्तानले ९ खेलमा मात्र ४ खेलमा जित निकाल्न सक्यो ।
पाकिस्तानले पछिल्लो चार वर्षमा प्राप्त गरेको अन्तराष्ट्रिय सफलता सामुहिक प्रर्दशनको आधारमा निस्किएको बताउँदै बाबरले यस यात्रामा सहयोग गर्ने सबैलाई धन्यबाद दिएका छन् ।
'म पाकिस्तानी क्रिकेटको सबै ढाचाबाट कप्तानको रुपमा राजीनामा दिदैछु । यो कठिन निर्णय हो । तर मलाई लागेको छ, यो सही समय हो । म खेलाडीको रुपमा सबै ढाचाको क्रिकेटमा उपलब्ध हुनेछु । म नयाँ कप्तान र टिमलाई आफ्नो अनुभव र प्रतिबद्धताले सहयोग गर्नेछु । यस जिम्मेवारीका लागि पाकिस्तानी क्रिकेट बोर्डलाई धन्यवाद दिन चाहन्छु ।' बाबरले भनेका छन् ।
एकदिवसीय क्रिकेटका नम्बर एक ब्याट्सम्यान बनेका बाबरले यस विश्वकपमा ९ खेलमा ३ सय २० रन बनाएका थिए ।
बाबरले निर्णयसँगै पाकिस्तानले टी ट्वान्टीमा साहीन शाह अफ्रिदीलाई नयाँ कप्तान चयन गरेको छ भने शान मसुदलाई टेष्ट कप्तान घोषणा गरेको छ ।
