अष्ट्रेलियालाई नेदरल्याण्ड्सको चुनौती

काठमाडौं । आईसीसी एकदिवसीय विश्वकप क्रिकेटमा आज बुधबार अष्ट्रेलिया र नेदरल्याण्ड्स भिड्दैछन् । खेल दिल्लीमा दिउँसो सवा २ बजे सुरु हुनेछ ।

खराब सुरुआत गरेको अष्ट्रेलिया प्रतियोगिता फर्कन तयार देखिन्छ । त्यसका लागि उसले बुधबार नेदरल्याण्ड्सलाई पन्छाउनुपर्नेछ ।

नेदरल्याण्ड्सले तेस्रो खेलमा साउथ अफ्रिकालाई ३८ रनले हराएको थियो । त्यसपछि श्रीलंकासँग ५ विकेटले पराजित भएको थियो । नेदरल्याण्ड्स चार खेलमा १ जित र ३ हारका साथ लिग तालिकाको सातौं स्थानमा छ ।

अघिल्लो खेलमा पाकिस्तानविरुद्ध शतक प्रहार गरेका ओपनर डेविड वार्नर र मिचेल मार्सको फर्मले अष्ट्रेलियालाई खुसी दिएको छ । त्यस्तै ४ विकेट लिएका एडम जम्पाको बलिङले अष्ट्रेलियालाई सकारात्मक उर्जा दिएको छ । 

डच टिम साइब्रान्ड एंगेलब्रेक्टको उच्च फर्मबाट उत्साहीत देखिन्छ । जसले पछिल्लो खेलमा ८२ बलमा ७० रन बनाएका थिए । यस्तै आर्यन दत्तले पछिल्लो खेलमा तीन विकेट लिएका थिए, उनी अष्ट्रेलियाविरुद्ध प्रभावकारी हुन सक्ने नेदरल्याण्ड्सको विश्वास छ ।

पछिल्लो समय तल्लोक्रमका ब्याट्सम्यानबाट रन बटुलिरहेको नेदरल्याण्ड्स शीर्ष क्रमका ब्याट्सम्यानबाट रन खोजिरहेको छ । 

अष्ट्रेलिया र नेदरल्याण्ड्स दुई पटक एकदिवसीय विश्वकपमा भेटेका छन्, जसमा दुवै खेल अष्ट्रेलियाले जितेको छ ।