विश्वकप आयोजनामा साउदीलाई नेपालको समर्थन 

काठमाडौं । सन् २०३४ को विश्वकप आयोजना गर्ने साउदी अरबको प्रस्तावलाई नेपालले समर्थन गर्ने भएको छ । 

आईतबार एक बिज्ञप्तिमार्फत अखिल नेपाल फुटबल संघ एन्फाले सन् २०३४ को विश्वकप आयोजनाको साउदी अरबको प्रस्तावमा नेपालले समर्थन गर्ने बताएको हो । 

एन्फाले सन् २०३४ को विश्वकप नेपालको पोजिसन स्पष्ट रहेको भन्दै साउदी अरबलाई समर्थन गर्ने बताएको हो ।

पछिल्लो समय साउदीमा अन्तराष्ट्रिय खेलकुद कार्यक्रमहरु आयोजना भैरहेको उल्लेख गर्दै एन्फाले साउदी अबरले भौतिक पूर्वाधारमा गरेको लगानी र साउदी अरबको भिजनरी नेतृत्वले सन् २०३४ को विश्वकप सफलतापूर्वक आयोजना गर्न सक्ने जनाएको छ । 

एन्फाले सबै एसियन सदस्य राष्ट्रले एसियाली भुमिका विश्वकप फुटबल फर्काउने अवसरलाई साथ दिने विश्वास समेत ब्यक्त गरेको छ । 

सन् २०३४ को विश्वकप आयोजनाका लागि एसियाली देशबाट मात्र प्रस्ताव लिने फिफाको निर्णय छ । सोही अनुसार एसियाबाट साउदी अरबले प्रतियोगिता आयोजनामा दाबी प्रस्तुत गरेको छ ।

सन् २०२६ को विश्वकप क्यानडा, मेक्सिकोसँग मिलेर अमेरिकाले आयोजना गर्दैछ भने सन् २०३० को विश्वकप तीन महादेशमा संयुक्त रुपमा आयोजना गर्ने फिफाको तयारी छ । त्यसपछि सन् २०३४ को विश्वकप आयोजनामा साउदी अबरले जोड गरेको छ । 

छिमेकी देश कतारले विश्वकपको सफल आयोजना गरेर विश्वभर आफ्नो प्रभुत्व दर्शाएको देखेर साउदीले समेत विश्वकप आयोजनालाई आफ्नो प्रतिष्ठा र शानसँग जोडेर हेरेको छ । सोही अनुसार विश्व फुटबलका ठुला ठुला स्टारलाई साउदी क्लबमा अनुबन्धन गरेर विश्व फुटबलको ध्यान खिच्न साउदी सफल समेत भएको छ ।