श्रेयालाई ‘स्कुल टू ट्रयाक’को उपाधि 

काठमाडौं । श्रेया आचार्यले स्कुल टू ट्रयाकको उपाधि जितेकी छिन् ।

नेपाल अटो मोबाइल्स एसोसियनसन (नासा नेपाल)द्धारा आयोजित एफ वान इन स्कुल्स अन्तर्गतको 'स्कुल्स टू ट्रयाक'को उपाधि काठमाडौं विश्व विद्यालय मेकानिकल इन्जिनियरिङकी श्रेयाले जितेकी हुन् ।

उपाधि सहित श्रेयाले २० हजार रुपैयाँ नगद प्राप्त गरिन् । 

प्रतियोगितामा सोही विद्यालयकी एलिसा सेजवाल दोस्रो र विनायकसिद्ध विश्वविद्यालयकी रोशनी भण्डारी तेस्रो बनिन् । दोस्रो बनेकी सेजवालले १० हजार र तेस्रो बनेकी भण्डारीले ५ हजार रुपैयाँ प्राप्त गरिन् ।

हिमालयन मोटरल्याण्डस्थित ३ सय ५० मिटरको ट्रयाकमा स्लालम विधिबाट आयोजना गरिएको काटर्सको प्रतिस्पर्धामा १४ जना खेलाडी अन्तिम प्रतिस्पर्धामा छनोट भएका थिए ।

शुक्रबार सहभागी खेलाडीलाई काटर्स सम्बन्धि शैद्धान्तिक ज्ञान प्रदान गरिएको थियो भने शनिबार प्रतिस्पर्धामा सहभागी गराईएको हो । 

सहभागी खेलाडीलाई नासा नेपालका कार्यकारी निर्देशक गोबिन्द भट्टराईले प्रशिक्षण दिएका थिए । 

उनले साहसीक खेल अन्तर्गतको स्कुल टू ट्रयाकले छात्राहरुको मनोबल बढाउने मात्र नभएर समुदाय र समाजमा महिलाले यस्ता कार्यमा उत्कृष्ट हुन सकिन्छ साहस भरेको बताएका थिए । 

अन्तराष्ट्रिय अटोमोबाईल्स फेडेरेसन (एफआईए)को सहयोगमा धुलिखेलको हिमालयन मोटरल्याण्डमा सञ्चालित प्रतियोगितालाई नासा नेपालको वुमन इन मोटरिङ कमिसन र मोटरल्याण्ड तथा काट्र्स कामिसनले ब्यवस्थापन गरेका हुन् ।