काठमाडौं । राष्ट्रिय खेलकुद परिषद् राखेपका सदस्य सचिव टंकलाल घिसिङले खेल संघहरुको वर्गीकरण गरिने बताएका छन् । नेपालमा मोटर स्पोर्टसको क्षेत्रमा काम गर्ने संस्था नासा नेपालको चुनावी साधारण सभालाई सम्बोधन गर्दै सदस्य सचिव घिसिङले नयाँ आर्थिक वर्षको त्रैमासिक समयभित्र खेलहरुको वर्गीकरण सक्ने गरि काम अघि बढेको बताए ।
‘दुई सय भन्दा धेरै संख्यामा रहेका खेल संघलाई दुई अंकमा झार्ने घोषणा गरेका थियौं । सोही अनुसार धेरै संघहरु निर्वाचन प्रक्रियामा रहेका छन् । अब पहिलो त्रैमासिक भित्र खेल संघहरुको समेत वर्गीकरण हुनेछ ।’ घिसिङले भने ।
नेपालमा पदाधिकारी बन्न र अवसर लिनमात्र राखेपमा खेल संघ दर्ता गर्ने खराब परम्परा छ । संघको अफिस झोलामा राखेर सञ्चालन गर्ने र पदाधिकारी बनेर विदेश यात्रा र खेलकुदको अनुदान लिन मात्र धेरै खेल संघ अस्तित्वमा रहदै आएका छन् ।
सदस्य सचिव घिसिङले खेलहरुको वर्गीकरण गरेर सोही अनुसार योजना र कार्यक्रम अघि बढाउने तयारीमा परिषद् रहेको जानकारी दिए ।
सदस्य सचिव घिसिङले ऐनलाई कर्मकाण्डी रुपमा लागु गर्नका लागि खेल संघहरुको प्रदेश संरचना नबनाउन चेतावनी दिए ।
‘राष्ट्रिय संघ बन्न कम्तिमा ४ प्रदेश र २० जिल्ला रहने व्यवस्थालाई मात्र पुरा गर्न संघहरुले प्रदेश संरचना कागजमा बनाउन हुदैन । हिजोका दिनहरुमा बन्द कोठामा कागजमा संघ गठन गर्ने गलत परम्परालाई रहेको थियो । अब नियमनकारी निकायको रुपमा प्रदेश संरचनाको कडाईका साथ अनुगमन गरिनेछ ।’ सदस्य सचिव घिसिङले भने ।
-1751597995.webp)
