आयरल्यान्डमाथि ओमानको सहज जित

काठमाडौं । ओमानले जिम्बावेमा जारी आइसिसी एकदिवसीय विश्वकप छनोटमा आयरल्यान्डलाई सहज रुपले हराएको छ ।

बुलावायो एथलेटिक्स क्लबमा भएको खेलमा आयरल्यान्ड ५ विकेटले पराजित भएको हो । 

आयरल्यान्डले दिएको २ सय ८२ रनको लक्ष्य ओमानले ४८ दशमलब १ ओभरमा ५ विकेट गुमाएर पूरा गर्यो । 

ओमानको जितमा कश्यप प्रजापती, अकिव ईलियास र जिशान मकसुदले अर्धशतकीय ईनिङ खेले । प्रजापतीले ७४ बलमा ६ चौका र १ छक्काको सहयोगमा ७२ रन बनाए ।

दोस्रो विकेटका लागि प्रजापती र अकिव ईलियासले ८८ बलमा ९४ रन को साझेदारी गरे । अकिवले ४९ बलमा ५२ रन बनाए ।

तेस्रो विकेटका लागि जिशान मकसुद र प्रजापतीले ५९ बलमा ६३ रनको साझेदारी गरे । कप्तान मकसुदले ६७ बलमा ४ चौका र १ छक्काको सहयोगमा ५९ रन बनाए । 

चौथो विकेटका लागि मकुसुद र मोहम्मद नदिमले ६६ बलमा ५६ रनको साझदारी गरे । नदिमले ५३ बलमा ४ चौकाको सहयोगमा अविजित ४६ रन बनाए । 

अयान खान २१ बलमा २१ रन बनाए । सोयब खान १९ रनमा अविजित रहे । 

आयरल्यान्डका जोशुवा लिटिल र मार्क अडिरले २/२ तथा जर्ज डोकरेलले १ विकेट लिए । 

त्यसअघि टस हारेर पहिला ब्याटिङको गरेको आयरल्यान्डले निर्धारित ५० ओभरमा ७ विकेट गुमाउँदै २ सय ८१ रन बनायो । 

आयरल्यान्डका लागि ह्यारी टेक्टर र जर्ज डोकरेलले अर्धशकीय ईनिङ खेले । डोकरेलले ८९ बलमा ७ चौका र २ छक्कासहित अविजित ९१ रनको अर्धशतकीय ईनिङ खेले । 

पहिलो विकेटका लागि ओपनरद्वय पाउन्ड स्टर्लिगं र एन्डि म्याकब्रिनले ५४ बलमा ५१ रन बनाउदै राम्रो सुरुआत दिलाएका थिए । स्टर्लिगले २७ बलमा २३ रन बनाउँदा म्याकवर्नीले २८ बलमा २० रन बनाए ।

त्यसपछिका खेलाडीहरुबीच उल्लेखनिय साझेदारी हुन सकेन । पाँचौ विकेटका लागि ह्यारी टेक्टर र जर्ज डोकरेलकाबीचमा १ सय २ बलमा ७९ रनको साझदारी भएको थियो । टेक्टरले ८२ बलमा ५ चौकाको सहयोगमा ५२ रन बनाए । 

आठौ विकेटका लागि डोकरेल र ग्राहम ह्युमबीच २४ बलमा ४१ रनको अविजित साझेदारी भयो । ह्युम १२ बलमा १५ रन बनाउँदै अविजित रहे ।

ओमानका बिलाल खान र फैयज बटले समान २/२ तथा जिशान मकसुद, आयन खान र जय ओडेराले समान १/१ विकेट लिए । 

जितसँगै ओमान २ अंकका साथ दोस्रो स्थानमा रहेको छ । हारसँगै अंक बिहिन आयरल्यान्ड तेस्रो स्थानमा रहेको छ ।