काठमाडौं । श्रीलंकाले आइसिसी एकदिवसीय विश्वकप छनोटमा युएईलाई सहज रुपमा पराजित गरि प्रतियोगितामा सुखद सुरुआत गरेको छ ।
क्विन्स स्पोर्ट्स क्लबमा भएको खेलमा युएई १ सय ७५ रनको फराकिलो अन्तरले पराजित भएको हो ।
श्रीलंकाले दिएको ३ सय ५६ रनको लक्ष्य पछ्याएको युएई ३९ ओभरमा १८० रनमा अलआउट भयो ।
युएईका लागि वृत्य अरविन्दले ५७ बलमा ४ चौकाको सहयोगमा ४१ रन बनाए । कप्तान मुहम्मद वासिमले ४८ बलमा ५ चौका र १ छक्काको सहयोगमा ३९ रन बनाए । अलि नासिरले ३२ बलमा ३ चौका र १ छक्काको सहयोगमा ३४ रन बनाए ।
रमिज शाहजादले ४३ बलमा २६ रन बनाए । ओपनरको भुमिकामा आएका रोहन मुस्ताफाले १५ बलमा २२ रन बनाए ।
श्रीलंकाका लागि वानिन्दु हसरंगाले ८ ओभरमा २४ रन खर्चिएर ६ विकेट लिए । महेश थिक्सना, लाहिरु कुमारा र धनन्जय डा शिल्भाले समान १/१ विकेट लिए ।
त्यसअघि टस हारेर पहिला ब्याटिङ गरेको श्रीलंकाले निर्धारित ५० ओभरमा ६ विकेट गुमाउँदै ३ सय ५५ रन बनाउन सक्यो ।
श्रीलंकाका लागि कुशल मेन्डिस, सदिरा समराविक्रमा,पथु निशंका र डिमुथ करुणारत्नेले अर्धशतक बनाए । कुशलले ६३ बलमा १० चौकासहित सर्वाधिक ७८ रन बनाए ।
श्रीलंकालाई ओपनर पाथुम निसांका र दिमुथ करुणारत्नेले ९५ रनको साझेदारी गर्दै राम्रो सुरुआत दिलाएका थिए । दिमुथ ५४ बलमा ७ चौकासहित ५२ रनमा आउट भए । निशंका ७६ बलमा ५ चौकासहित ५७ रनमा बासिल हामिदको बलमा बोल्ड हुन पुगे ।
तेस्रो विकेटका लागि कुशल र सदिरा समाराविक्रामाले १ सय ५ रनको शतकीय साझेदारी गरेका थिए ।सदिराले ६४ बलमा ९ चौकासहित ७३ रन बनाउँदै रन आउट भए ।
चरिथ असालंका २३ बलमा ५ चौका र २ छक्कासहित ४८ रनमा आउट भए । वानिन्दु हसरंगा १२ बलमा ३ चौकासहित २३ रनमा अविजित रहे ।
युएईका युवा तीव्र गतिका बलर अली नासिरले तथा रोहन मुस्तफा, आयन खान र बासिल हामिदले समान १/१ विकेट लिए ।
जितसँगै श्रीलंका २ अंक सहित समुह बी को शीर्ष स्थानमा रहेको छ । पराजित युएई अंकबिहिन रुपमा दोस्रो स्थानमा रहेको छ ।
