तिलोत्तमा । रुपन्देही जिल्लाको तिलोत्तमा नगरपालिकाको स्थित पूर्व दरखसवामा निजि क्षेत्रको लगानीमा पहिलो पटक बन्न लागेको अन्तर्राष्ट्रिय रंगशालाको शिलान्यास भएको छ ।
अष्ट्रेलियामा रहेको एक्स्ट्राटेक ओभल नामक आइटी कम्पनीले बनाउन लागेको रंगशालालाई तिलोतमा नगरपालिका मेयर रामकृष्ण खाड, एक्स्ट्राटेक ओभल प्रालीका निर्देशक विनोद कुँवर र चिफ अप्रेटिङ अफिसर सुदिक्षा गौतम लगायतले शिलान्यास गरेका हुन् ।
करिब २५ हजार दर्शक क्षमता रहेको रंगशालाको २ वर्षअघि जग्गा खरिद प्रक्रिया गरिएको थियो । पहिलो वर्षमा ५ हजार दर्शक क्षमता बराबरको रंगशाला बनाउने योजना रहेकोे निर्देशक कुँवरले बताए ।
`क्रिकेट रंगशाला बन्छ या बन्दैन भन्ने कुरामा कसैले दुईमत नराख्नु । हामीले केही गर्न नसकेपनी रोलर हालेर क्रिकेट खेल्न मिल्ने अवस्था छ । विदेशमा मैले जे समयको महत्त्व बुझेको छु त्यो गरेर देखाउनेछु । हामीले सोचेको समयमा नै हुनेछ,´ कुँवरले भने ।
निर्देशक कुँवरले शक्ति गौचनलाई मैदान बनाउने जिम्मा दिएका कारण पनि आफुहरु समयमै रंगशाला बन्नेमा विश्वस्त रहेकोे बताए ।
प्रत्येक वर्ष ५ हजार दर्शक क्षमता थप्दै ४ वर्ष भित्र २५ हजार दर्शक क्षमताको क्रिकेट रंगशाला बनाइने छ । एक्स्ट्राटेक ओभल क्रिकेट मैदानलाई रंगशालाको स्वरुपमा निर्माण सम्पन्न गर्दा ४० करोड रुपैया लाग्ने अनुमान गरिएको छ ।
क्रिकेट रंगशाला होस्टलसहितको एकेडेमी र ट्रेनिङ सेन्टर राखेर गौचनलाई जिम्मेवारी दिइने एक्स्ट्राटेकले जनाएको छ । यसका साथै रंगशाला कम्पाउन्डमा चार तलाको भवन बनाई १ सय जनालाई एकेडेमीमा राखेर प्रशिक्षण दिइने कुवरले भने । रंगशालामा क्युरेटरको जिम्मेवारी यूएईमा लामो समय बसेर अवुधावीको शेख जायेद अन्तर्राष्ट्रिय क्रिकेट लिएका माधव पाठक क्युरेटरको भुमिकामा राखेको छ । 
-1755526339.jpg)
