एसिया कप पाकिस्तान र श्रीलंकामा हुने सम्भावना

एजेन्सी । एसिया कप २०२३ पाकिस्तान तथा श्रीलंकामा आयोजना हुने सम्भावना बढेको छ । एसिया कपका लागि पाकिस्तान क्रिकेट बोर्ड (पिसिबी) ले प्रस्तावित गरेको हाइब्रिड मोडेललाई एसियन क्रिकेट काउन्सिल (एसीसी) ले अनुमोदन गर्ने सम्भावना बढेको छ । 

जसमा श्रीलंका तटस्थ स्थल हुनेछ जहाँ भारतले आफ्नो खेल खेल्ने छ । यो मोडल अनुसार पाकिस्तानमा प्रतियोगिताका १३ खेलमध्ये सम्भवतः पाँच खेल देख्न सकिन्छ । भारत र पाकिस्तानबीचको सबै खेल श्रीलंकामा खेलाइनेछ । फाइनल समेत श्रीलंकामा हुनेछ ।

प्रतियोगिता सेप्टेम्बर १ देखि १७ सम्म हुने सम्भावना रहेको छ । पाकिस्तानमा भारत बाहेकको लिग चरणको खेल हुनेछ । लिग चरणका सबै खेल लाहोरमा हुने सम्भावना छ ।

पाकिस्तानले सुरुमा युएईलाई दोस्रो स्थलको रूपमा प्रस्ताव गरेको थियो । सो समयमा युएईमा हुने गर्मीलाई मध्यनजर गरेर पाकिस्तान पछि हटेको बुझिएको छ । 

विश्वकपको तयारीका लागि ५० ओभरको ढाँचामा आयोजना हुने एशिया कपमा नेपालसँगै भारत र पाकिस्तान समूह ए मा छन् । अर्को समूहमा श्रीलंका, बंगलादेश र अफगानिस्तान छन् ।

सन् २०२२ को ढाँचामा जस्तै प्रत्येक समूहका शीर्ष दुई टोली सुपर फोर राउन्डमा पुग्नेछन् । त्यसपछि शीर्ष दुई टोलीले फाइनल प्रतिस्पर्धा गर्नेछन् ।