सन्दीपको विश्वकप छनोटमा सहभागीताको निर्णय आज

काठमाडौं । नेपाली राष्ट्रिय पुरुष क्रिकेट टोलीका महत्वपूर्ण सदस्य सन्दीप लामिछानेको विश्वकप छनोटमा सहभागीताबारेको निर्णय आज आईतबार आउने भएको छ । 

नेपाल क्रिकेट संघ(क्यान) का कार्यवाहक सचिव दुर्गाराज पाठकका अनुसार सन्दीपको विश्वकप छनोटमा सहभागीता हुने नहुने भन्ने बारे निर्णय आज आउने बताए । 

'सन्दीप नेपाली राष्ट्रिय टोलीका एक महत्वपूर्ण सदस्य हुन् । उनलाई विश्वकप छनोट जस्तो महत्वपूर्ण प्रतियोगितामा सहभागीता गराउन क्यान हर तरहले लाईरहेको छ ,' पाठकले खेलपाटीलाई भने 'सन्दीपको विषयमा अदालतले आज अन्तिम निर्णय दिनेछ ।'

आईसीसी एकदिवसीय विश्वकप छनोटको अन्तिम तयारीका लागि नेपाली टोली हाल दक्षिण अफ्रीकामा रहेको छ । नेपाली टोलीका मुख्य प्रशिक्षक मोन्टी देसाई केही दिनमा नै दक्षिण अफ्रीका जाने पाठकले बताए । 

'भिसा समस्याका कारण कोच दक्षिण अफ्रीका जानु भएको थिएन । भिसाको काम अन्तिम तिर पुगेकाले उहाँ पनि केही दिनमा नै दक्षिण अफ्रीकामा टोलीमा सामेल हुनु हुनेछ ,' उनले बताए । 

दक्षिण अफ्रीकामा नेपालले नेदरल्यान्ड्स र स्कटल्यान्डसँग अभ्यास खेल खेल्नेछ । नेपालले जेठ २५ गते बिहिबार पहिलो खेल स्कटल्यान्डसँग रहेको छ । जेठ २७ गते शनिबार नेदरल्यान्ड्ससँगको दोस्रो अभ्यास खेल रहेको छ ।

अभ्यास खेल ५० ओभरको रहने छ । नेपाली टोली गत मंगलबार दक्षिण अफ्रीका प्रस्थान गरेको थियो ।