श्रीलंकाविरुद्ध अफगानिस्तानको सहज जित
काठमाडौं । पाहुना टोली अफगानिस्तानले घरेलु टोली श्रीलंकाविरुद्धको पहिलो एकदिवसीय अन्तर्राष्ट्रिय(ओडिआई) खेलमा जित हात पारेको छ ।
हम्मनटोटामा भएको पहिलो खेलमा घरेलु टोली ६ विकेटले पराजित भएको हो । जितसँगै अफगानिस्तानले तीन खेलको ओडिआई सिरिजमा १-० को अग्रता लिएको छ ।
घरेलु टोली श्रीलंकाले दिएको २ सय ६९ रनको लक्ष्य पाहुना टोली अफगानिस्तानले ४६ दशमलब ५ ओभरमा ४ विकेट गुमाएर पूरा गर्यो ।
पाहुना टोलीका लागि ईब्राहिम जाड्रानले ९८ बलमा ११ चौका र २ छक्काको सहयोगमा ९८ रनको अर्धशतकीय ईनिङ्स खेले । रहमत शाहले ८० बलमा ३ चौकाको सहयोगमा ५५ रनको अर्धशतकीय ईनिङ्स खेले ।
२५ रनमा पहिलो विकेट गुमाएको पाहुना टोलीका लागि जाड्रान र शाहले दोस्रो विकेटका लागि १ सय ४६ रनको साझेदारी गरेर टोलीलाई जित नजिक पुर्याए ।
कप्तान हशमतुल्लाह शाहिदी ३८ रन बनाउँदा मोहम्मद नाबी २७ रनमा अविजित रहे ।
घरेलु टोलीका लागि कुशन रजिंथाले २ तथा मथिशा पथिराना र लाहिरु कुमाराले समान १/१ विकेट लिए ।
त्यसअघि टस हारेर पहिला ब्याटिङ गरेको घरेलु टोलीले निर्धारित ५० ओभरको अन्तिम बलमा अलआउट हुदै २ सय ६८ रन बनायो ।
घरेलु टोली श्रीलंकाका लागि चरिथ असलांका ९५ बलमा १२ चौकाको सहयोगमा ९१ रन बनाउँदै आउट भए ।
धनन्जय डि सिल्भा ५९ बलमा ५ चौकासहित ५१ रनको अर्धशतकीय ईनिङ खेले । पाँचौं विकेटका लागि चरिथ र डी सिल्भाले १ सय ८ बलमा ९९ रनको महत्वपूर्ण साझेदारी गरेका थिए ।
पथुम निशंकाले ३८ रन बनाउँदा डेब्यू खेल खेलेका दासुन हेमान्था २० बलमा २२ रन बनाए ।
कप्तान दासुन शनाका १७ तथा एन्जिलो म्याथ्युज १२ रनमा आउट भए ।
पाहुना टोली अफगानिस्तानका लागि फैजलहक फारुकी र फरिद अहमदले समान २/२ विकेट लिए ।
अजमतुल्लाह उमरजाई, मुजिब उर रहमान, नूर अहमद र मोहम्मद नाबीले समान १/१ विकेट लिए ।
दुई देशबीचको दोस्रो ओडिआई खेल आगामी आईतबार रहेको छ ।
