निजगढ । महेन्द्र नारायण निधि टी-ट्वान्टी क्रिकेट प्रतियोगिता अन्तर्गत दोश्रो दिनको खेलमा मधेश र बागमती विजयी भएका छन् ।
मंगलबार भएको पहिलो खेलमा बागमतीले कोशीलाई ३ विकेटले पराजित गरेको हो ।
उद्घाटन खेलमा मधेशसँग हारेको कोशी लगातार दोश्रो खेलमा पराजित भएको छ ।
टस जितेर पहिले ब्याटिङ गरेको कोशी ९ विकेटको क्षतिमा ९९ रनमा समेटियो । कोशीका लागि मुकुन्द यादवले सर्वाधिक २८ रन बनाए भने कमल खत्रीले २६ र कप्तान सिद्धान्त लोहनीले १० रन बनाउनु बाहेक अन्य ब्याटरले दोहोरो अंकमा रन बनाउन सकेनन् ।
बागमतीका लागि रिजन ढाकालले सर्वाधिक ३ विकेट लिए भने तिलक भण्डारीले २ र इशान पान्डे, सुर्य तामाङ र कृजन गुरुङले समान १÷१ विकेट लिए ।
१०० रनको विजयी लक्ष्य बागमतीले २० ओभरमा ७ विकेट गुमाउदै पूरा गर्यो । बागमतीका लागि कप्तान इशान पान्डेले सर्वाधिक २९ रन बनाए भने ओपनर आशुतोश घिरैयाले २४, गौरब खड्काले १२ र गौतम केसीले १३ रन बनाए ।
कमजोर लक्ष्य पछ्याएको बागमतीलाई दबाबमा राखेको कोशीको लागि मुकुन्द यादव र प्रकाश कार्कीले २÷२ विकेट लिए भने फिर्दोश अन्सारी,सर्वण यादव र कमल खत्रीले १÷१ विकेट लिए ।
खेलको म्यान अफ द म्याच बागमतीका रिजन ढकाल भए । ढकालले ४ ओभरमा २२ रन खर्चिदै ३ विकेट लिएकाथिए ।
मंगलबारै सम्पन्न दोश्रो खेलमा मधेशले गण्डकीलाई पराजित गर्दै लगातार दोश्रो जित हात पारेको छ ।
टस जितेर पहिले ब्याटिङ गरेको मधेशले ७ विकेटको क्षतिमा १७२ रन बनाएको थियो । आक्रामक ब्याटिङ गरेको मधेशका लागी अनिल साह र पवन सराफले अर्धशतक बनाए ।
मधेशका अनिल साहले ३७ बलमा ५ छक्का र ३ चौकाको मद्धतमा ६२ रन बनाए भने पवन सराफले ४१ बलमा २ छक्का र ७ चौका प्रहार गर्दै ५१ रन बनाए । कप्तान हरि शंकर साहले १६,विशाल शुस्लिङले १४ र रुपेश सिङले १८ रन बनाए ।
गण्डकीको लागि अमृत गुरुङ र कमल परियारले २÷२ विकेट लिए भने चन्द्र पौडेल र सुबाष भण्डारीले १÷१ विकेट लिए । जवाफी ब्याटिङ गर्ने क्रममा गण्डकी १९.३ ओभरमा १०० रन बनाउदै अल आउट भयो ।
गण्डकीका कमल परियारले सर्वाधिक २८ रन बनाए भने कप्तान अमृत गुरुङले १३ र इश्वर क्षेत्रीले २४ रन बनाउनु बाहेक अन्य ब्याटर हरुले दोहोरो अङ्कमा रन बनाउन सकेनन ।
गण्डकीलाई अल आउट गर्ने क्रममा मधेशका कप्तान हरि शंकर साहले सर्वाधिक ३ विकेट लिए भने रुपेश सिंह,बिबेक यादव र प्रदिप पासवानले समान २÷२ विकेट लिदा विशाल पटेलले १ विकेट हात पारे ।
खेलको म्यान अफ द म्याच मधेशका लागि सर्वाधिक रन बनाएका अनिल साह भए ।
जनकपुरधामस्थित रामजानकी रंगशालामा जारी प्रतियोगिता अन्तर्गत बुधबार बिहान ९ बजेबाट हुने पहिलो खेलमा लुम्बिनी र बाग्मतिले प्रतिस्पर्धा गर्नेछ भने दिउसो १ बजेदेखि हुने दोश्रो खेलमा कर्णाली र गण्डकी प्रदेश भिड्नेछ ।
