काठमाडौं । नेपाल र मलेसियाबीचको पाँच खेलको टी-ट्वान्टी अन्तराष्ट्रिय सिरिज सोमबारबाट सुरु हुदैछ ।
सिरिजको पहिलो खेल वाइएसडी यूकेएम ओभलमा नेपाली समय अनुसार सोमबार बिहान पौने ९ मा सुरु हुनेछ । ११ महिना पछि अन्तराष्ट्रिय क्रिकेट खेल्न लागेको नेपाली टोली जितका साथ सिरिजको सुरुआत गर्न चाहान्छ ।
टी-ट्वान्टी अन्तर्राष्ट्रियमा नेपाल र मलेसियाको टोली हालसम्म तीन पटक आमने सामने भएका छन् । तीनै खेलमा नेपाली टोली अपराजित रहेको छ ।
नेपाल र मलेसियाबीचको पहिलो टी-ट्वान्टी अन्तर्राष्ट्रिय खेल थाईल्यान्डमा भएको थियो । १३ जनवरी २०१९ मा थाईल्यान्डमा आयोजना भएको टी-ट्वान्टी साम्सका क्रममा यि दुई टोलीको खेल भएको थियो ।
सो खेलमा नेपाल ६ विकेटले विजयी भएको थियो । यस खेलमा नेपालका रोमा थापाले सर्वाधिक रुपमा अविजित २२ रन बनाएकी थिईन् । सरिता मगरले चार विकेट लिएकी थिईन् ।
नेपाल र मलेसियाबीचको दोस्रो खेल २०१९ मै थाईल्यान्डमा भएको थियो । आइसीसी महिला टी-ट्वान्टी विश्वकपको एसिया क्षेत्र छनोटमा सो भेट भएको थियो ।
मलेसियासँगको दोस्रो भेटमा नेपाल ३४ रनले विजयी भएको थियो । सो खेलमा सीताराना मगरले सर्वाधिक ४२ रन बनाएकी थिईन् । सरिता मगर र करुण भन्डारीले समान २/२ विकेट लिएकी थिईन् ।
मलेसियासँगको नेपालको पछिल्लो भेट २०२१ मा युएईमा भएको थियो । आइसीसी महिला टी-ट्वान्टी विश्वकपको एसिया क्षेत्र छनोटमा सो भेट भएको थियो ।
नोभेम्बर २६ मा भएको सो खेलमा नेपाल ६ विकेटले विजयी भएको थियो । नेपालमका लागि सो खेलमा सीताराना मगरले सर्वाधिक ३० रन बनाएकी थिईन् । सवनम राईले २ विकेट लिएकी थिईन् ।
