शुभमनको बिष्फोटक शतकमा गुजरातको जित 

काठमाडौं । ओपनर शुमन गिलको शतकमा गुजरात टाईटन्सले रोयल च्यालेन्जर्स बेंगलोरलाई जारी ईन्डियन प्रिमियर लिग(आइपीएल)को लि चरणको अन्तिम खेलमा पराजित गरेको छ ।

प्लेअफमा स्थान बनाउनका लागि जित्नै पर्ने खेलमा घरेलु मैदान एम चेन्नास्वामीमा बेंगलोर ६ विकेटले पराजित भएको हो । 

बेंगलोरले दिएको १ सय ९८ रनको लक्ष्य गुजरातले १९ दशमलब १ ओभरमा ४ विकेट गुमाएर पूरा गर्यो । 

गुजरातको जितमा ओपनर शुभमन गिलले ५२ बलमा ५ चौका र ८ छक्काको सहयोगमा अविजित १ सय ४ रनको शतकीय ईनिङ्स खेले । आइपीएल करियरको दोस्रो शतक गिलले ५२ बलमा पूरा गरे । 

आइपीएल करियरमा बनाएको दुवै शतक गिलले यसै सिजन प्रहार गरेका हुन् । 

सुरुआत राम्रो हुन नसकेको गुजरातका लागि पहिलो विकेटका रुपमा ओपनर ऋद्धिमान शाह व्यक्तिगत १२ रनमा तेस्रो ओभरमा नै आउट भएका थिए । जितको आधार तय गर्ने क्रममा दोस्रो विकेटका लागि गिल र विजय शंकरले ७१ बलमा १ सय २३ रनको सानदार साझेदारी गरे । 

शंकरले ३५ बलमा ७ चौका र २ छक्काको सहयोगमा ५३ रनको अर्धशतकीय ईनिङ्स खेले । राहुल तिवातिया ४ रनमा अविजित रहे । 

बेंगलोरका लागि मोहम्मद सिराजले २ तथा विजयकुमार वैशाख र हर्षल पटेले समान १/१ विकेट लिए । 

त्यसअघि टस हारेर पहिले ब्याटिङ गरेको बेंगलोरले निर्धारित २० ओभरमा ५ विकेट गुमाएर १ सय ९७ रन बनाएको थियो । 

बेंगलोरका लागि विराट कोहलीले ६१ बलमा १३ चौका र १ छक्काको सहयोगमा अविजित १ सय १ रनको शतकीय ईनिङ्स खेले पनि टोलीलाई जित दिलाउन भने सकेनन् । आइपीएल करियरको र्कीतिमानी सातौं शतक कोहलीले ६० बलमा पूरा गरेका थिए । 

पहिलो विकेटका लागि अर्का ओपनर तथा टोलीका कप्तान फाफ डु प्लेसिससँग मिलेर कोहलीले ४३ बलमा ६७ रन बनाउँदै राम्रो सुरुआत दिलाएका थिए । डु प्लेसिसले १९ बलमा ५ चौकाको सहयोगमा २८ रन बनाए । 

माइकल ब्रेसवेलले १६ बलमा ५ चौकाको सहयोगमा २६ रन बनाए । अनुज रावतले १५ बलमा १ चौका र १ छक्काको सहयोगमा अविजित २३ रन बनाए । 

गुजरातका लागि नूर अहमदले २ तथा यश दयाल,मोहम्मद सामी र राशिद खानले समान १/१ विकेट लिए । 

जितसँगै गुजरातले १४ खेलमा १० जित र ४ हार सहित २० अंकका साथ लिगको समूह चरण सकाएको छ । गुजरातले प्लेअफको पहिलो क्वालिफायर खेलमा मंगलबार चेन्नाई सुपर किंग्सको सामना गर्नेछ । 

बेंगलोर पराजित हुँदा मुम्बई इन्डियन्सले प्लेअफमा स्थान बनाएको छ । बेंगलोरले १४ खेलमा ७ जित तथा ७ हारका साथ छैटौं स्थानमा रहेर लिग सकाएको छ ।