काठमाडौं । २०२४ को टी-ट्वान्टी विश्वकपका लागि २० देशको छनोट हुनेछन् । विश्वकपमा सहभागी रहने बाह्र देश छनोट भईसक्दा आठ देशको भने छनोट हुन बाँकी रहेको छ ।
२०२४ को विश्वकपमा २० देशको सहभागीता रहनेछ । गत वर्ष अष्ट्रेलियामा आयोजना भएको टी-ट्वान्टी विश्वकपमा शीर्ष आठमा पर्न सफल टोली (अष्ट्रेलिया,इंग्ल्यान्ड,भारत,पाकिस्तान,नेदरल्यान्ड,श्रीलंका,न्युजिल्यान्ड र दक्षिण अफ्रिका), आयोजक वेस्ट इन्डिज र अमेरिका तथा १४ नोभेम्बर २०२२ सम्मको आइसीसीको टी-ट्वान्टी अन्तराष्ट्रियको वरीयताका शीर्ष २ टोली( बंगलादेश र अफगानीस्तान अष्ट्रेलिया विश्वकपको शीर्ष आठमा पछिका दुई टोली जो शीर्ष आठमा अटाएका थिएनन्) छनोट भई सकेका छन् ।
विभिन्न क्षेत्रिय छनोटबाट अन्य आठ देशको टुंगो लाग्न बाँकी रहेको छ । यसका लागि विभिन्न क्षेत्रिय छनोट प्रतियोगिताहरु आयोजना हुनेछन् । आइसीसीको नियमअनुसार एसिया क्षेत्रिय छनोटबाट दुई ,अफ्रिकी क्षेत्रबाट दुई,युरोप क्षेत्रबाट दुई तथा अमेरिका र ईष्ट एसिया प्यासेफिकबाट समान एक एक राष्ट्रको छनोट हुनेछ ।
नेपाल कसरी छनोट हुन्छ ?
नेपालले यस विश्वकपमा छनोट हुन एसिया क्षेत्रको छनोट पार गर्नुपर्ने हुन्छ । एसिया क्षेत्रको छनोट आगामी नोभेम्बर १ देखि १० सम्म नेपालमा आयोजना हुदैछ । प्रतियोगितामा आठ देशको सहभागीता रहने छ । प्रतियोगितामा आयोजक नेपाल,युएई,हङकङ,ओमान,सिंगापुर,बहराइन र उप-क्षेत्रिय छनोटबाट आउने दुई राष्ट्रबीच प्रतिस्पर्धा हुनेछ ।
उप-क्षेत्रिय छनोटमा दुई क्षेत्रको समावेश रहने छ । उपक्षेत्रीय छनोट क्वालिफायर ए र क्वालिफायर बी गरी आयोजना हुनेछ । जुलाईमा मलेसियामा आयोजना हुने क्वालिफायर बी मा आयोजक मलेसिया सहित थाईल्यान्ड,चीन,भुटान र म्यानमारको सहभागीता रहने छ । क्वालिफायर ए को प्रतियोगिता सेप्टेम्बरमा कतारमा आयोजना हुदैछ । यस समूहमा आयोजक कतार सहित साउदी अरेविया,कुवेत र माल्दिभ्सको सहभागीता रहेको छ ।
यि दुवै उप-क्षेत्रिय छनोटबाट हरेक क्वालिफायरको शीर्ष स्थानमा रहने टोलीले आगामी नोभेम्बरमा नेपालमा आयोजना हुने एसिया क्षेत्रीय छनोटमा सहभागीता जनाउने छन् । प्रतियोगितामा सहभागी रहने आठ टोलीलाई दुई समूहमा बिभाजन गरिने छ । हरेक समूहका शीर्ष दुई टोली सेमिफाइनलमा प्रवेश गर्नेछन् ।
समूह ए को बिजेताले समूह बी को उपबिजेतासँग पहिलो सेमिफाइनल तथा समूह बी को बिजेताले समूह ए को उपबिजेतासँग दोस्रो सेमिफाइनल खेल खेल्नेछ । दुवै सेमिफाइनलको बिजेता देशले फाइनलमा स्थान बनाउनुका साथै २०२४ को टीट्वान्टी विश्वकपमा स्थान पक्का गर्ने छ ।
नेपालले विश्वकपमा स्थान बनाउन फाइनलसम्मका यात्रा गर्न जरुरत रहेको छ ।
नेपालको सम्भावना के रहेको छ ?
२०१४ मा बंगलादेशमा आयोजना भएको टी-ट्वान्टी विश्वकपमा पहिलो पटक सहभागीता जनाएको नेपाललाई दश वर्ष पछि २०२४ मा आयोजना हुने विश्वकपमा सहभागी हुने अवसर रहेको छ । यस छनोट प्रतियोगिताका लागि नेपाली टोलीलाई घरेलु मैदान तथा समर्थक र अन्य धेरै विषयको फाइदा हुनेछ । पछिल्लो केही महिना यता नेपाली टोलीको घरेलु भुमीको प्रदर्शनले नेपाललाई विश्वकपको मन्चमा धेरै समर्थकले देखिसकेका छन् ।
यस छनोट अघि नेपालले आईसीसी एकदिवसीय विश्वकप ग्लोबल छनोट तथा एसिया कप जस्ता प्रतियोगितामा जनाईसकेको हुनेछ । जसले गर्दा नेपाली टोलीको अनुभवमा समेत केही बदलाब आईसकेको हुनेछ ।
छनोटमा सहभागी मुलुकविरुद्ध नेपालको ईतिहास ?
एसिया क्षेत्रीय छनोटमा सहभागी हुने छ मुलुकको टुंगो लागि सकेको छ । यस्तोमा ती मुलुकविरुद्ध टी-ट्वान्टी अन्तर्राष्ट्रियको ईतिहास हेर्दा नेपालको प्रदर्शन औसत रहेको छ । हङकङसँग नेपालले कुल पाँच खेल खेलेकोमा दुई खेलमा नेपालले जित हात पारेको छ । तीन खेल भने हङकङले आफ्नो पक्षमा पारेको छ । ओमानसँग नेपालले कुल चार खेल खेलेकोमा तीन खेल नेपालले तथा एक खेल ओमानले जितेको छ ।
सिंगापुरविरुद्ध कुल दुई खेलमा नेपालले एक खेलमा जित दर्ता गर्दा एक खेल हारेको छ । युएईविरुद्ध पाँच खेल खेलेको नेपालले दुई खेलमा जित दर्ता गर्दा तीनमा हार व्यहोरेको छ । बहराइनविरुद्ध भने नेपालले हालसम्म टी-ट्वान्टी अन्तर्राष्ट्रिय खेल खेलेको छैन ।
-1755401924.jpg)
