काठमाडौं । नजमुल हसन शान्तोको शतकमा बंगलादेशले दोस्रो एकदिवसीय अन्तर्राष्ट्रिय(ओडिआई) मा आयरल्यान्डलाई पराजित गरेको छ ।
इंग्ल्यान्डमा शुक्रबार सम्पन्न भएको खेलमा बंगलादेश ३ विकेटले विजयी भएको हो । जितसँगै बंगलादेशले तीन खेलको ओडिआई सिरिजमा १-० को अग्रता लिएको छ ।
आयरल्यान्डले दिएको ३ सय २० रनको लक्ष्य बंगलादेशले ४४ दशमलब ३ ओभरमा ७ विकेट गुमाएर पूरा गर्यो ।
बंगलादेशका लागि नजमुल हसन शान्तोले ९३ बलमा १२ चौका र ३ छक्काको सहयोगमा १ सय १७ रनको शतकीय ईनिङ्स खेले । ओडिआई करियरको पहिलो शतक प्रहार गरेका २४ वर्षिय शान्तोले ८३ बलमा शतक पूरा गरेका थिए ।
ओपनर तमिम ईकवाललाई चौथो ओभरमा ७ रनमा नै गुमाएको बंगलादेशका लागि अर्का ओपनर लिन्टन दासले २१ बलमा २१ रन बनाए ।
मोहम्मद तौहिद हृदय र शान्तोले चौथो विकेटका लागि १ सय ३१ रनको महत्वपूर्ण साझेदारी गरेका थिए । मोहम्मदले ५८ बलमा ५ चौका र ३ छक्काको सहयोगमा ६८ रनको अर्धशतकीय ईनिङ्स खेले ।
मुश्फिकुर रहिम ३६ रनमा अविजित रहँदा शकिव अल हसनले २६ रन बनाए । जर्ज डकरेल र कुर्टिस क्याप्फियरले समान २/२ तथा ग्रेह्याम हुम,जोशवा लिटिल र मार्क अडिरले समान १/१ विकेट लिए ।
त्यसअघि बर्षाका कारण ४५ ओभरमा छोट्टाईएको खेलमा टस हारेर पहिले ब्याटिङ गरेको आयरल्यान्डले निर्धारित ओभरमा ६ विकेट गुमाएर ३ सय १९ रन बनाएको थियो ।
आयरल्यान्डका लागि ह्यारी टेक्टरले १ सय १३ बलमा ७ चौका तथा १० छक्काको सहयोगमा १ सय ४० रनको शतकीय ईनिङ्स खेले पनि टोलीलाई जित दिलाउन भने सकेनन् । ओडिआईमा चौथो शतक बनाउने क्रममा २३ वर्षिय टेक्टरले ९३ बलको सामना गरेका थिए ।
सुरुआत राम्रो हुन नसकेको आयरल्यान्डका ओपनर पल स्ट्रर्लिङ पहिलो ओभरमा शुन्य रनमा नै पेभिलियन फर्किएका थिए । अर्का ओपनर स्टेफन डोहिने व्यक्तिगत १२ रनमा सातौ ओभरमा आउट हुँदा संकटमा देखिएको आयरल्यान्डको ईनिङ्स कप्तान एन्डि बालबर्नी र ह्यारी टेक्टरले तेस्रो विकेटका लागि ९८ रनको साझेदारी गर्दै सम्हालेका थिए ।
कप्तान बालबर्नीले ५७ बलमा ५ चौकाको सहयोगमा ४२ रन बनाए । छैटौं विकेटका लागि ह्यारी टेक्टर र जर्ज डुकरेलले १ सय १५ रनको महत्वपुर्ण साझेदारी गर्दै टोलीलाई विशाल योगफलमा पुर्याएका थिए ।
डुकरेलले ४७ बलमा ३ चौका र ४ छक्काको सहयोगमा अविजित ७४ रनको अर्धशतकीय ईनिङ्स खेले ।
बंगलादेशका लागि हसन महमुद र शोरिफुल ईस्लामले समान २/२ तथा ईबाडोट हसन र तैजुल ईस्लामले समान १/१ विकेट लिए ।
दुई टोलीबीचको अन्तिम ओडिआई खेल आगामी आईतबार हुनेछ ।
-1755401924.jpg)
