जितका नायक जडेजामाथि आइसीसीको कारबाही 

काठमाडौं । भारतीय अलराउण्डर रविन्द्र जडेजालाई आइसीसीले कारबाही गरेको छ । 

अस्ट्रेलियाविरुद्धको नागपुर भएको पहिलो टेस्टको तेस्रो दिनमा नै घरेलु टोलीले १ ईनिङ १ सय ३२ रनको जित हात पारेको थियो ।

सोही खेलमा आइसीसीको आचार संहिताको धारा २.२० उल्लङ्घन गरेको आरोपमा जडेजालाई कारबाही भएको हो । 

कारबाही स्वरुप जडेजाले म्याच फिको २५ प्रतिशत जरिवाना तिर्नु पर्नेछ । 

पहिलो टेस्टको पहिलो दिन अस्ट्रेलियाको पहिलो इनिङ चलिरहेको थियो। जडेजाले आफ्नो बलिङ हातको औंलामा क्रीम लगाएको देखिएको थियो।

प्रत्यक्ष प्रसारणमा जडेजाले आफ्ना सहकर्मी मोहम्मद सिराजको हातबाट एक पदार्थ निकालेर प्रयोग गरेको देखिएको थियो । 

जडेजा भारतको जितका नायक रहेका थिए । उनले पहिलो इनिङमा पाँच विकेट लिएसँगै अस्ट्रेलिया पहिलो ईनिङमा १ सय ७७ रनमा समेटिएका थियो ।

त्यसपछि उनले ७० रनको पारी खेलेका थिए । भारतले आफ्नो पहिलो इनिङमा ४०० रन बनाएको थियो । जडेजा पहिलो टेस्टका लागि प्लेयर अफ द म्याच समेत घोषित भएका थिए ।