खेलकुद महासंघको नेतृत्व चयनको सरगर्मी सुरु

काठमाडौं । नेपाल खेलकुद महासंघको दोस्रो राष्ट्रिय महाधिवेशन विराटनगरमा फागुनको पहिलो साता सुरु हुदैछ । एमालेको जनवर्गिय संगठनको रुपमा रहेको महासंघको केन्द्रिय महाअधिवेशन फागुन ७ देखि ९ गतेसम्म विराटनगरमा हुन लागेको हो ।

महाधिवेशनले नयाँ नेतृत्व सहित सिंगो कार्यसमिति चयन गर्दैछ । एमालेको खेलकुद हाँक्ने संगठनको रुपमा रहेको खेलकुद महासंघको नयाँ नेतृत्व चयनका लागि सरगर्मी सुरु भएको छ । 

महासंघको नयाँ नेतृत्वका लागि वर्तमान संयोजक पर्शुराम बस्नेत सहित आधा दर्जन नेता प्रत्यासी देखिएका छन् । महासंघको संयोजक रहेका बस्नेत निर्वाचनमार्फत खेलकुद महासंघको नेतृत्वमा आउन चाहेका छन् । तर महासंघको आसन्न महाधिवेशनमा खेलकुद पृष्ठभुमीकै नेतालाई संगठनको नेतृत्वमा स्थापित गराउनुपर्ने लबिङ समेत चर्को छ ।

खेलकुद पृष्ठभुमीका सुबास श्रेष्ठ, उपेन्द्र पौडेल, भिम ओली, ओमकृष्ण प्रसाई, चेतनराज गिरी लगायतका नेताले महासंघको आसन्न नेतृत्वका लागि गृहकार्य गरिरहेका छन् । युवा संघको राजनीति पृष्ठभुमीबाट खेलकुदमा आएका प्रभातबिक्रम कट्वाल समेत अध्यक्षका अर्का प्रत्यासी हुन् । 

महासंघको नयाँ कार्यसमितिको आकार टुङ्गो लागिसकेको छैन । तर नेतृत्वमा दाबी गरेर पदाधिकारीमा अटाउने धेरै नेताको रणनीति देखिन्छ । नयाँ कार्यसमितिको महासचिवका लागि उमेश केसी चौलागाईले आन्तरिक गृहकार्य गरिरहेका छन् । देशभरबाट आउने प्रतिनिधिको अन्तिम छनोट टुङ्गो लागेपछि नेतृत्वको रस्साकस्सी थप पेचिलो बन्ने महासंघका एक पदाधिकारी बताउँछन् । 

एमालेको खेलकुदको मुद्धालाई बोक्ने संगठनको रुपमा नेपाल खेलकुद महासंघको स्थापना २०६५ सालमा बुटवल महाधिवेशनमा भएको हो । पुरुषोत्तम पौडल लगायतका नेता महाधिवेशनमा पराजित बनेपछि तत्कालिन पाटी अध्यक्ष झलनाथ खनालले पौडेलको नेतृत्वको महासंघको गठन गरेका थिए । एमालेभित्र खेलकुद महासंघ तत्कालिन नेतृत्वमा रहेका झलनाथ खनाल र माधव नेपालको गुटको रुपमा काम गरेको आरोप लाग्ने गरेको थियो । 

महासंघलाई काउन्टर दिन एमालेभित्र केपी ओली समूहले मदन भण्डारी स्पोर्टस फाउन्डेसनको नाममा खेलकुदमा गतिविधि गर्दै आएका थिए । तत्कालिन नेकपाको विभाजनपछि तत्कालिन प्रधानमन्त्री एवंम पाटी अध्यक्ष ओलीले रमेश पौडेलको नेतृत्वमा महासंघको पुनर्गठन गरेका थिए । पौडेल लगायतका नेता पार्टीको केन्द्रिय कमिटीमा आएपछि पर्शुराम बस्नेतलाई महासंघको संयोजक तोकिएको हो । बस्नेत संयोजकत्वको कमिटीले विराटनगरमा महासंघको दोस्रो महाधिवेशन गर्ने तयारी गरेको छ ।