फरवार्ड विजयले मछिन्द्रबाट लिग खेल्ने  

काठमाडौं ।  सहिद स्मारक 'ए' डिभिजन लिगको साविक विजेता मछिन्द्र फुटबल क्लबले फरवार्ड विजय भुजेललाई अनुबन्ध गरेको छ ।

मछिन्द्रले बुधबार फरवार्ड विजयलाई अनुबन्धित गरिएको जनाएको छ ।

मछिन्द्रले नयाँ सिजनको सहिद स्मारक 'ए' डिभिजन लिगका लागि विजयलाई अनुबन्ध गरेको हो ।

नयाँ सिजनको 'ए' डिभिजन लिग फागुन १९ गतेबाट सुरु हुँदैछ ।

विजयले अघिल्लो सिजनको लिग थ्री स्टार क्लबबाट खेलेका थिए ।

यस अघि मछिन्द्रले मिडफिल्डर पुजन उपरकोटी, डिफेन्डर निसेन सुब्बा, फरवार्ड सौरभ लिम्बु  र प्रशान्त अवस्थीलाई अनुबन्ध गरेको थियो ।

त्यस्तै राष्ट्रिय टिमका डिफेन्डर देवेन्द्र तामाङ, फरवार्ड विमल घर्ति मगर,  मिडफिल्डर सुजल श्रेष्ठ र मिडफिल्डर अविशेक गुरुङसँगको सम्झौता नवीकरण गरिसकेको छ ।