काठमाडौं । राष्ट्रिय खेलकुद परिषद् (राखेप) ले आसन्न एसियन गेम्समा खेल संख्या थप्ने तयारी गरेको छ । यस वर्ष चीनको हाङझावमा आयोजना हुने प्रतियोगितामा नेपालले केही खेल संख्या थप्ने भएको हो ।
राखेपको बोर्ड बैठकले आसन्न एसियन गेम्समा २३ खेल समावेश गर्ने निर्णय गरेको थियो । घरेलु प्रतियोगिता, अन्तराष्ट्रिय नतिजा, खेलाडीको प्रर्दशन र नतिजाको सम्भावनाका आधारमा राखेपले २३ खेललाई आसन्न एसियाडमा सहभागी गराउने निर्णय गरेको थियो । सोही अनुसार राखेपले एसियाडमा सहभागी हुने खेल र खेलाडीको बन्द प्रशिक्षण सुरु गरेर प्रतियोगिताको तयारी थालेको थियो ।
चीनमा आयोजना हुने भनिएको प्रतियोगिता कोभिडका कारण एक वर्षपछि सरेपछि राखेपले समेत केही खेल संख्या थप्ने तयारी गरेको हो । एसियन गेम्स सहित अन्तराष्ट्रिय प्रतियोगिताको तयारीका लागि भन्दै राखेपले हाइ पर्फमेन्स कमिटी गठन गरेको थियो । कमिटीकै सुझावका आधारमा राखेपले २३ खेलको छनोट गरेको थियो ।
‘तत्कालिन समयमा खेलको सम्भावनाका आधारमा २३ खेल छनोट गरेको थियौं । तर पछिल्लो समय राम्रो देखिएका र नतिजा ल्याएका केही खेललाई समावेश गर्नुपर्छ भन्ने निष्कर्शमा पुगेका छौं । एसियन गेम्समा केही खेलको संख्या बढ्ने देखिन्छ ।’ हाइ पर्फमेन्स कमिटीका सदस्य एवंम नेपाल ओलम्पिक कमिटीका महासचिव निरेन्द्रराज श्रेष्ठले खेलपाटीसँग भने ।
गत कात्तिममा भएको नवौं राष्ट्रिय खेलकुद र पछिल्लो समय अन्तराष्ट्रिय रुपमा सफल देखिएको इ स्पोर्टसको सम्भावनालाई हेरेर केही खेलको संख्या थप्ने तयारी गरिएको हो । श्रेष्ठका अनुसार टेनिस, स्क्वास, रग्बी, इ स्पोर्टस लगायतका केही खेललाई एसियन गेम्समा लैजाने गरि गृहकार्य अघि बढेको छ ।
‘हामीले एसियन गेम्समा जान सक्ने सम्भावना बोकेका खेल संघका पदाधिकारीलाई बोलाएर छलफल गरेका छौं ।’ श्रेष्ठले भने, ‘एसियन गेम्समा तपाईको खेललाई किन लैजाने र सम्भावना के छ भनेर कुराकानी गरेका छौं । घरेलु गतिविधि, अन्तराष्ट्रिय सहभागीता, खेलाडीको नतिजालाई आधार बनाएर केही खेल थप्ने तयारी छ ।’
राखेपले माघको तेस्रो सातादेखि एसियन गेम्सको तयारी अघि बढाउने निर्णय गरेको छ । सम्भावित २३ खेलको नियमित प्रशिक्षण ९० दिन सञ्चालन गर्ने गरि तयारी अघि बढेको हो । नियमित प्रशिक्षणसँगै विशेष, बन्द र वैदेशिक प्रशिक्षणको काम अघि बढाउने राखेपको तयारी छ । एसियन गेम्स चीनमा यही वर्षको सेप्टेम्बर २३ देखि अक्टोबर ८ सम्म आयोजना हुदैछ ।
राखेपले आसन्न एसियन गेम्समा तेक्वान्दो, कराँते, बक्सिङ, एथलेटिक्स, साईक्लिङ, महिला फुटबल, गल्फ, कुस्ती, भारत्तोलन, जुडो, पौडी, ट्रायथलन, उसु, आर्चरी, बास्केटबल, महिला कबड्डी, फेन्सिङ, महिला ह्यान्डबल, महिला भलिबल, पुरुष भलिबल, पुरुष क्रिकेट, सुटिङ, ब्याडमिन्टन र टेबल टेनिस सहभागी गराउने निर्णय गरिसकेको छ ।
