फरवार्ड राजेश फ्रेन्ड्समा अनुबन्धित

काठमाडौं । सहिद स्मारक 'ए' डिभिजन लिग क्लब फ्रेन्ड्सले फरवार्ड राजेश परियारलाई अनुबन्ध गरेको छ ।

फ्रेन्ड्सले आइतबार सामाजिक संजालबाट फरवार्ड राजेशलाई अनुबन्ध गरिएको जनाएको छ ।

फ्रेन्ड्सले नयाँ सिजनको 'ए' डिभिजन लिगका लागि राजेशलाई पहिलो खेलाडीको रुपमा अनुबन्ध गरेको हो ।

राजेशले अघिल्लो सिजन न्युरोड टिम (एनआरटी) क्लबबाट खेलेका थिए ।

१३ औं दक्षिण एसियाली खेलकुद (साग) मा स्वर्ण पदक जित्दा नेपाली टोलीमा रहेका राजेशसँग भारतको एआरए एफसी अहमदाबादबाट भारतको 'बी' डिभिजनको आई लिग खेलेको अनुभव रहेको छ ।

नयाँ सिजनको 'ए' डिभिजन लिग फागुन १९ गतेबाट सुरु हुँदैछ । लिग डबल राउण्ड रोबिनको आधारमा हुनेछ ।

फ्रेन्ड्सले नवप्रवेशी एफसी खुमलटारसँग खेल्दै नयाँ सिजनको सुरुआत गर्नेछ ।