आयोजक वालिङलाई उपाधि

वालिङ । आयोजक वालिङ युनाईटेड फुटबल क्लबले वालिङ गोल्डकप फुटबल प्रतियोगिताको उपाधि जितेको छ ।

शनिबार भएको फाइनलमा एभिनियर एफसी क्यामरुनलाई पेनाल्टी सुटआउटमा ४-३ गोल अन्तरले हराउँदै वालिङ च्याम्पियन बनेको हो ।  

खेलको निर्धारित र थप गरिएको समय गोलरहित बराबरी भएपछि खेल पेनाल्टीमा गएको थियो ।

पेनाल्टीमा वालिङका सुबाश गुरुङ, विश्वास श्रेष्ठ, टिक राज गुरुङ र विसु थापाले गोल गरे । कप्तान लक्ष्मण रुचाल गोल गर्न असफल भए ।

एभिनियरका एमबौनी जिन, एनगुइमबोउस स्टेफेन, बिली फ्रान्क डानिलले गोल गरे । गुइनि मारी डानिल र अब्डोउ रामानी पेनाल्टीमा चुके ।

उपाधिसँगै वालिङले नगद ५ लाख प्राप्त गरेको छ ।  उपविजेता बनेको एभिनियरले २ लाख ५० हजार प्राप्त गर्यो ।

प्रतियोगिताको सर्वाधिक गोलकर्ता एभिनियरका टिम्बा चुनिए ।

उत्कृष्ट डिफेन्डर वालिङका आशिष गुरुङ, उत्कृष्ट मिडफिल्डर वालिङका कमल थापा, उत्कृष्ट फरवार्ड वालिङका टिक राज गुरुङ, उत्कृष्ट गोलकिपर वालिङका राजा बाबु थापा र उत्कृष्ट प्रशिक्षक वालिङका दिपिप थापा चुनिए ।

इमर्जिङ प्लेयर वालिङ एफसी जुनियरका रुमेश हमाल र फेयर प्ले टिमको अवार्ड लिस्नु एफसी रुपन्देहीले जितेको छ।

व्यक्तिगत विधातर्फ उत्कृष्ट हुनले जनही ७ हजार प्राप्त गरे ।

वालिङ युनाईटेड फुटबल क्लबको आयोजनामा भएको प्रतियोगितामा आठ टोलीको सहभागिता रहेको थियो ।