आर्मीलाई हराउँदै एभिनियर सेमिफाइनलमा

वालिङ । क्यामरुनको एभिनियर एफसी वालिङ गोल्डकप फुटबल प्रतियोगिताको सेमिफाइनलमा प्रवेश गरेको छ ।

सोमबार भएको अन्तिम क्वाटरफाइनलमा त्रिभुवन आर्मी क्लबलाई ३-१ ले हराएर एभिनियर अन्तिम चारमा पुगेको हो ।

खेलको २१ औं मिनेटमा अब्देलले गोल गर्दै एभिनियरलाई सुरुआती अग्रता दिलाएका थिए । उनी खेलको म्यान अफ दि म्याच समेत चुनिए ।

२६ औं मिनेटमा टिम्बाले गोल गर्दै एभिनियरको अग्रता दोब्बर बनाए ।

खेलको ४२ औं मिनेटमा दिनेश हेन्जनले फ्रिकिकबाट गोल गर्दै आर्मीलाई २-१ को स्थितिमा ल्याए ।

तर, पहिलो हाफको इन्जुरी समयमा अनिसेले गोल गर्दै एभिनियरलाई ३-१ को जित दिलाए ।

अब एभिनियरले सेमिफाइनलमा वालिङ रेडसँग प्रतिस्पर्धा गर्नेछ ।

प्रतियोगिताको विजेताले ५ लाख नगद प्राप्त गर्ने छन् ।  उपविजेताले २ लाख ५० हजार पाउने छन् ।

यस्तै प्रतियोगिताको सर्वोत्कृष्ट खेलाडीले १० हजार पाउने छन् । व्यक्तिगत विधातर्फ उत्कृष्ट हुनले जनही ७ हजार पाउने छन् ।

यस्तै आयोजक वालिङ युनाईटेड फुटबल क्लबले आर्मी क्लबका कप्तान भरत खवासलाई सम्मान गरेको छ ।

नेपाली फुटबलमा पुर्राएको योगदानको कदर गर्दै भरतलाई सम्मान गरिएको आयोजकले जनाएको छ ।