काठमाडौं । युक्रेनी क्लब शाख्तर डोनेट्स्कले फरवार्ड मिखाइलो मुड्रिक चेल्सीमा अनुबन्धित भएपछि प्राप्त रकमबाट २२ मिलियन पाउण्ड युक्रेन युद्ध पीडितलाई सहयोग गर्ने भएको छ ।
शाख्तरका अध्यक्ष रिनाट अख्मेटोभले मुड्रिक स्थानान्तरणबाट प्राप्त रकमबाट २२ मिलियन युक्रेन युद्धमा पीडितलाई सहयोग गर्ने बताएका छन् ।
'हर्ट अफ एजोभस्टल' नामक परियोजनाबाट उक्त रकम युद्धबाट मारिएका सैनिकका परिवारलाई सहयोग गरिनेछ ।
युक्रेनमा रुसले २०२२ बाट आक्रमण सुरु गरेको थियो ।
सोमबार मात्र युक्रेनी फरवार्ड मुड्रिक ८९ मिलियन पाउण्डमा चेल्सीमा अनुबन्धित भएका थिए । जुन युक्रेनी क्लब फुटबलको ट्रान्सफरमा कीर्तिमानी रकम हो ।
२२ वर्षीय फरवार्डले चेल्सीसँग साढे आठ वर्षको सम्झौता गरेका छन् ।
यस सिजन उनले शाख्तरका लागि १२ लिग खेलमा ७ गोल गरेका थिए ।
उनले चेल्सीमा १२ नम्बरको जर्सी लगाउने छन् ।
