काठमाडौं । पाकिस्तानका तीव्र गतिका बलर नसिम शाहको घातक बलिङ तथा तीन अर्धशतकको सहयोगमा घरेलु टोली पाकिस्तानले न्युजिल्याण्डलाई पहिलो एकदिवसीयमा पराजित गरेको छ ।
तीन खेलको सिरिजको पहिलो खेलमा घरेलु टोलीले ६ विकेटको जित हात पारेको हो । यस जितसँगै पाकिस्तान तीन खेलको एकदिवसीय सिरिजमा १-० ले अघि रहेको छ ।
कराँचीको नेशनल स्टेडियममा भएको खेलमा नसिम शाहले १० ओभरमा ५७ रन खर्चिएर ५ विकेट लिए पछि न्युजिल्याण्डले २ सय ५६ रनको लक्ष्य दिएकोमा पाकिस्तानले ११ बल बाँकी रहँदै ४ विकेट गुमाएर २ सय ५८ रन बनायो ।
घरेलु टोलीका लागि बाबर अजाम,मोहम्मद रिजवान र फकर जमानले अर्धशतक बनाए । रिजवान ८६ बलमा ७७ रनमा अविजित रहँदा कप्तान बाबर ८२ बलमा ६६ रन बनाउँदै आउट भए ।
ओपनर जमानले ७४ बलमा ५६ रन बनाए । हरिस सोहिल ३२ रनमा आउट हुँदा आगा सलमान १३ रनमा अविजित रहे।
पाहुना टोलीका लागि मिचेल ब्राकवेलले २ तथा ग्लेन फिलिप्स र टिम साउदीले समान १/१ विकेट लिए ।
त्यसअघि पहिले ब्याटिङ गरेको पाहुना टोलीले ५० ओभरमा ९ विकेट गुमाएर २ सय ५५ रन बनायो ।
न्युजिल्याण्डका लागि मिचेल ब्राकवेल ४३ रनमा नशिम शाहको बलमा बोल्ड भए । उस्मान मिरको बलमा आउट हुनु पुर्व टोम लाथमले ४२ रन बनाए ।
ग्लेन फिलिप्स ३७ रनमा आउट हुँदा ड्यारियल मिचेलले ३६ रन बनाए । ओपनर फिना एलेनले २९ रन बनाउँदा कप्तान के विलियम्सले २६ रन बनाए । मिचेल स्यान्टेनर २१ रनमा आउट भए ।
घरेलु टोलीका लागि नसिम शाहले १० ओभरमा ५७ रन खर्चिएर ५ विकेट लिदाँ उस्मान मिरले २ विकेट लिए । मोहम्मद वासिम र मोहम्मद नवाजले समान १/१ विकेट लिए ।
दुई टोली बीचको दोस्रो एकदिवसीय बुधबार हुनेछ ।
