विराटनगरमा दुई नेदरल्याण्ड र एक हङकङका खेलाडी, प्रशिक्षकमा पटवाल

काठमाडौं । आगामी मंसिर तेस्रो साताबाट सुरु हुने एभरेष्ट प्रिमियर लिग (ईपीएल) टी-ट्वान्टी क्रिकेटका लागि विराटनगर वारीवर्सले विदेशी खेलाडी र प्रशिक्षक घोषणा गरेको छ ।

साबिकको विजेता समेत रहेको विराटनगरले नेदरल्याण्डका दुई र एक हङकङका खेलाडी अनुबन्ध गरेको हो ।

विराटनगरले नेदरल्याण्डका राष्ट्रिय टोलीका सदस्य पाउल भान मीकेरन र रोएलोफ भान डेर मेर्वीलाई अनुबन्ध गरेको हो । यस्तै हङकङका राष्ट्रिय टोलीका बाबर हायात र भारतका स्मित पटेललाई समेत अनुबन्ध गरेको छ ।

यस्तै विराटनगरले भारतका उमेस पटवाललाई प्रशिक्षक नियुक्त गरेको छ । पटवाल नेपाली राष्ट्रिय क्रिकेट टोलीका कन्सल्ट्यान्ट कोच समेत हो । 

ईपीएल आगामी मंसिर २२ देखि पुस ६ गतेसम्म सञ्चालन हुनेछ । प्रतियोगिताका लागि आयोजकले प्रत्येक टिमले ३ विदेशी खेलाडी अनुबन्ध गर्नुपर्ने नियम बनाएको छ । जस अनुसार विराटनगरले विदेशी खेलाडी अनुबन्ध गरेको हो ।