लिभरपुल चौंथो चरणमा, टोटेनहम बाहिरियो

काठमाडौं । प्रिमियर लिग क्लब लिभरपुल काराबाओ कप फुटबलको चौंथो चरणमा प्रवेश गरेको छ ।

बुधबार राति भएको खेलमा डर्बी काउन्टीलाई पेनाल्टी सुटआउटमा ३-२ गोल अन्तरले हराउँदै लिभरपुलले अर्को चरणमा स्थान बनाएको हो ।

खेलको निर्धारित समय गोलरहित बराबरीमा सकिएपछि खेल पेनाल्टीमा गएको थियो ।

पेनाल्टीमा लिभरपुलका हार्भे इलियट, डार्विन नुनेज र एलेक्स चेम्बरलिनले गोल गरे । रोबर्टो फिर्मिन्हो र स्टेफानले गोल गर्न सकेनन् ।

काउन्टीका लुइ सिब्ले र डाभिड  म्याकगोल्ड्रीकले गोल गर्दा लेविस डोबिन, क्रेग र कोनोरले गोल गर्न सकेनन् ।

टोटेनहम भने तेस्रो चरणबाट बाहिरिएको छ ।

नटिङघम फरेस्टसँग २-० ले पराजित भएपछि टोटेनहम बाहिरिएको हो ।

फरेस्टको जितमा रेनन लोडी र जेसे लिंगार्डले एक एक गोल गरे ।

फरेस्टले चौंथो चरणमा स्थान बनाएको छ ।