काठमाडौं । भारतले शीर्ष स्थानमा रहदै अष्ट्रेलियामा जारी आईसीसी टी-ट्वान्टी विश्वकप क्रिकेटको सेमिफाइनलमा प्रवेश गरेको छ ।
मेलबर्नमा आइतबार समूह चरणको अन्तिम खेलमा जिम्बावेलाई ७१ रनले हराउँदै भारत समूह विजेताको रुपमा अन्तिम चारमा पुगेको हो ।
भारतले दिएको १ सय ८७ रन को लक्ष्यसहित जवाफी ब्याटिङ गरेको जिम्बावेले १७ ओभर २ बलमा अलआउट हुँदै १ सय १५ रन मात्र बनाउन सक्यो ।
जिम्बावेका लागि रायन ब्रुलले ३५ रन जोड्दा सिकन्दर राजाले ३४ रन बनाए ।
कप्तान क्रेइग इर्भिनले १३ तथा सिन विलियम्सले ११ रन बनाए ।
भारतका रविचन्द्र आश्विनले ३ तथा मोहमद शामी र हार्दिक पाण्डयले २/२ विकेट लिए ।
त्यसअघि पहिले ब्याटिङ गरेको भारतले २० ओभरमा ५ विकेट गुमाएर १ सय ८६ रन बनाएको थियो ।
भारतका लागि सूर्यकुमार यादवले अविजित रहदै ६१ रनको अर्धशतकीय इनिङ खेले ।
यस्तै केएल राहुलले ५१ रनको अर्धशतकीय इनिङ खेले । विराट कोहलीले २६ रन जोड्दा हार्दिक पाण्डयले १८ तथा कप्तान रोहित शर्माले १५ रन जोडे ।
जिम्बावेका सिन विलियम्सले २ विकेट लिए ।
जितसँगै भारतले समूह २ मा ५ खेलमा ८ अंक जोड्यो । र, शीर्ष स्थानमा रह्यो ।
जिम्बावे भने ३ अंक जोडेर समूहको पुछारमा रह्यो ।
यस समूहबाट पाकिस्तान दोस्रो स्थानमा रहदै अन्तिम चारमा पुग्यो ।
पाकिस्तानले ५ खेलमा ६ अंक जोड्यो ।
भारतको यस जितसँगै प्रतियोगिताको सेमिफाइनल समीकरण समेत पूरा भएको छ ।
अब सेमिफाइनलमा भारतले इंग्ल्यान्ड तथा न्युजिल्याण्डले पाकिस्तानको समान गर्नेछ ।
समूह १ बाट न्युजिल्याण्ड शीर्ष र इंग्ल्यान्ड दोस्रो स्थानमा रहदै अन्तिम चारमा पुगेको हो ।
