एजेन्सी । इंग्लिश क्लब म्यानचेस्टर सिटी युईएफए च्याम्पियन्स लिग फुटबलमा लियोनसंग बराबरीमा रोकिएको छ । मंगलबार राति भएको खेलमा सिटी फ्रेन्च क्लब लियोनसंग २ - २ को बराबरीमा रोकिएको हो ।
लियोनको मैदानमा २ पटकको अग्रता उल्टाएर सिटीले बराबरी खेलेको हो । यो बराबरीसंगै सिटी अन्तिम १६ को यात्रा तय गर्न सफल भएको छ ।
प्रतिस्पर्धात्मक बनेको खेलको पहिलो हाफ गोलरहित बराबरीमा सकिएको थियो । तर, दोस्रो हाफमा लियोनले सुरुवाती अग्रता बनायो ।
खेलको ५५ औं मिनेटमा म्यासवेल कर्नेटले गोल गर्दै लियोनलाई सुरुवाती अग्रता दिलाए । तर, ६२ औं मिनेटमा एम्रिक लापोर्टेले गोल गर्दै सिटीलाई खेलमा फर्काए ।
त्यसपछि खेलको ८१ औं मिनेटमा कर्नेटले व्यक्तिगत दोस्रो गोल गर्दै लियोनलाई २ - १ को अग्रता दिलाए । तर, त्यसको तीन मिनेट भित्र ८३ मिनेटमा सर्जियो अग्युरोले गोल गर्दै सिटीलाई २ - २ को बराबरीमा ल्याए ।
यो बराबरीसंगै समूह 'एफ' को सिटीले ५ खेलबाट १० अंक जोडेको छ । र, सिटी समूहको शीर्ष स्थानमा समेत रहेको छ ।
लियोन ५ खेलबाट ७ अंक जोडेर दोस्रो स्थानमा छ । लियोनको पनि नकआउट चरणको सम्भावना रहेको छ ।
यसै समूहको अर्को खेलमा शख्तर डोनेक्स्टले होफेनहाइमलाई ३ - २ ले पराजित गरेको छ ।
