मेस्सीसँग सम्झौता थप्न चाहन्छ, पीएसजी 

काठमाडौं । पेरिस सेन्ट जर्मेन (पीएसजी)ले लियोनल मेस्सीसँग सम्झौता थप गर्न चाहेको छ । पीएसजीका स्पोर्टिङ एडभाइजर लुइस कम्पासले लियोनल मेस्सीसँग सम्झौता थप गर्न चाहेको बताएका छन् । 

सात पटकका वालेन डी ओर खेलाडी सन् २०२१ मा फ्रेन्च क्लबमा आएका थिए । उनले पीएसजीसँग दुई वर्षको सम्झौता गरेका थिए । उनले प्रति सिजन ३५ मिलियन पाउण्डको सम्झौता गरेका छन् ।

पीएसजीले मेस्सीलाई क्लबमा राख्ने प्रयासलाई अघि बढाएको छ ।

फ्रेन्च मिडियासँग कुरा गर्दै कम्पासले मेस्सीको असाधारण व्यवसायीकताबाट आफु प्रसन्न रहेको बताएका छन् ।

पीएसजीका अध्यक्ष नासिर अल खालिफाले समेत मेस्सीबाट आफु प्रभावित भएको बताएका छन् । उनले मेस्सीसँग हरेक दिन काम गर्न पाउदा खुसी मिल्ने बताए । 

मेस्सी अहिले राम्रो फर्ममा समेत देखिएका छन् । उनले यस सिजन १५ खेलमा ९ गोल गरेका छन् भने १० गोलको अवसर सिर्जना गरेका छन् ।

रिपोर्टहरुका अनुसार मेस्सीलाई क्लबमा राख्न वित्तिय हिसाबले पीएसजीलाई समस्या पर्ने देखिएको छ । पछिल्लो सिजन ३ सय ६ मिलियन नोक्सानका कारण पीएसजीलाई मेस्सी राख्न वित्तिय हिसाबले गाह्रो हुने देखिएको हो ।

रिपोर्टका अनुसार पीएसजी मेस्सीसँग थप एक वर्षको सम्झौता गर्न चाहेको छ । तर क्लबले अहिलेसम्म औपचारिक प्रस्ताव राखेको छैन । मेस्सीलाई अनुबन्ध गर्न युरोपका ठुला क्लबले समेत इच्छा देखाईरहेका छन् । मेस्सीले भने कतार विश्वकप पछि मात्र भविष्यको बारेमा निर्णय लिने बताएका छन् ।

बार्सिलोनासँगको सम्झौता सकिएपछि मेस्सी सन् २०२१ मा निशुल्क रुपमा बजारमा उपलब्ध थिए । उनले क्लबसँग सम्झौता थप्न चाहेका थिए । तर अन्तिममा उनले बार्सिलोना छाड्न पर्यो । बार्सिलोनाको बित्तिय समस्याका कारण मेस्सी स्पेनबाट बाहिरिनु परेको थियो । 

मेस्सीले बार्सिलोना छाडेपछि पीएसजीले उनी सहित नेयमार, एमबाप्पेलाई अग्रपङ्तीमा राखेर टिम निर्माण गरेको छ ।