चाँडै मैदान फर्कने जिदानको संकेत 

काठमाडौं । फ्रेन्च फुटबल तथा रियल मड्रिडका लिजेन्ड जिनेदिन जिदानले ब्यवस्थापकको रुपमा चाँडै फुटबलमा फर्कने संकेत गरेका छन् । लामो समय फुटबल ब्यवस्थापकको रुपमा विश्राम लिएका जिदानले आफु चाँडै मैदानमा फर्कने तयारी गरिरहेको बताएका छन् ।

जिदानले दोस्रो पटक नेतृत्व सम्हालेको रियल मड्रिडलाई सन् २०२१ मा छाडेका थिए । उनले आफु र क्लब बोर्डबीच सम्पर्क टुटेको उल्लेख गर्दै रियल मड्रिड छाड्ने निर्णय गरेका थिए । 

५० वर्षिय जिदानले ब्यवस्थापकको रुपमा चाँडै फुटबलमा फर्कने तयारी गरेका छन् । सोमबार राति पेरिसमा ग्रेविन संग्रहालयको अनावरण कार्यक्रममा जिदानले आफु चाँडै ब्यवस्थापकको रुपमा फुटबलमा फर्कने योजना बनाएको बताएका हुन् । 

आरएमसी स्पोर्टससँग बोल्दै जिदानले भनेका छन्, 'के मलाई कोचको सुटको याद आउँछ ? म धेरै टाढा छैन । मैले प्रतिक्षा गरिरहेको छु । थोरै बढी प्रतिक्षा गरेको छु ।' 

'एकदमै नजिक, एकदमै नजिक । म प्रशिक्षकको रुपमा टाढा छैन ।' उनले भनेका छन् । 

जिदानले रियल मड्रिडलाई लगातार तीन पटक लगातार च्याम्पियन्स लिगको उपाधि जिताएका थिए । उनले सन् २०१५ देखि २०१८ को बीचको यो सफलता प्राप्त गरेका हुन् । स्पेनिस क्लब रियल फुटबल इतिहासमा लगातार तीन च्याम्पियन्स लिगको उपाधि जित्ने पहिलो क्लब हो । 

उनले दुई ला लिगाको उपाधि समेत जितेका थिए । उनले क्लब छाड्नु अघि दुई पटक विश्वको उत्कृष्ट प्रशिक्षकको अवार्ड हात पारेका थिए । शहरी प्रतिद्धन्दी एट्लेटिकोसँग लिग उपाधि गुमाउन परेपछि जिदानले क्लब छाडेका थिए । 
फ्रान्सेली लिजेन्ड जिदानले मौरिसियो पोचिटिनो बर्खास्तमा परेपछि पेरिस सेन्ट जर्मेन (पीएसजी) सम्हाल्ने आकलन गरिएको थियो । तर जिदान पीएसजी आउन नमानेपछि क्रिस्टोफर गाल्टियरले सो जिम्मेवारी पाएका छन् । 

खासमा जिदानले फ्रान्सको राष्ट्रिय फुटबल टिमको जिम्मेवारीको प्रतिक्षा गरिरहेका छन् । खेलाडीको रुपमा सफल जिदानले एक पटक प्रशिक्षकको रुपमा सो उपाधि जिताउन चाहन्छन् । तर डिडियर डेसच्याम्पलेनै अर्को महिना कतारमा हुने विश्वकपमा फ्रान्सको नेतृत्व गर्नेछन् ।

जिदानको पछिल्लो प्रतिक्रियाले विश्वकप सकिए लगत्तै उनले फ्रान्सेली टिमको लागि तयार गरिरहेको देखिन्छ ।

जिदानका लागि युरोपका ठुला क्लबमा अहिले स्थान देखिदैन । रियल मड्रिड आफ्ना प्रशिक्षक कार्लोस एन्सेलोटीसँग खुसी छ भने पीएसजीले समेत प्रशिक्षक गाल्टियरलाई सहयोग गरिहेको छ । जिदान जोडिएको म्यानचेस्टर युनाईटेडले डच प्रशिक्षक इरिक टेन हगलाई प्रशिक्षकमा नियुक्त गरिसकेको छ ।