इम्री एस्टन भिल्लाका मुख्य प्रशिक्षक 

काठमाडौं । इङ्लिस प्रिमियर लिग क्लब एस्टन भिल्लाले उनइ इम्रीलाई मुख्य प्रशिक्षकमा नियुक्त गरेको छ । भिल्ला क्लबले स्टेभन जेरार्डको स्थानमा इम्रीलाई क्लबको मुख्य प्रशिक्षकमा नियुक्त गरेको हो । 

इम्री लण्डन क्लब आर्सनलका पूर्व प्रशिक्षक हुन् । स्पेनिस क्लब भिल्ला रियलका प्रशिक्षकलाई प्रिमियर लिग क्लबले मुख्य जिम्मेवारी दिएको हो । उनले नेभेम्बर एकदेखि भिल्ला क्लबको कमान्ड सम्हाल्नेछन् । 

प्रिमियर लिगमा फुलहमसँग ठुलो अन्तरले पराजित भएपछि भिल्लाले मुख्य प्रशिक्षक जेरार्डलाई बर्खास्त गरेको थियो । इम्रीको क्लबसँगको सम्झौता अर्को समर सिजनसम्म रहेको छ ।

‘उनको श्रम स्विकृतीको काम सकिएपछि उनले अर्को हप्तादेखि जिम्मेवारी सम्हालनेछन् ।’ क्लबले भनेको छ ।

‘एस्टन भिल्ला उनइ इम्रीलाई मुख्य प्रशिक्षकमा नियुक्त गर्न पाउँदा खुसी ब्यक्त गर्दछ ।’ क्लबले भनेका छ ।

‘उच्च स्तरका अनुभवी प्रशिक्षक, जसले ९ सय खेलको कमान्ड सम्हालेका छन् । उनले यसअघि प्रिमियर लिग क्लब आर्सनल सम्हालेका थिए । उनले क्लबलाई युरोपा लिगको फाइनलसम्म पुर्याएका थिए ।’ क्लबले थपेको छ । 

इम्रीले सेभिल्ला र पेरिस सेन्ट जर्मेनमा सुखद समय बिताएका थिए । उनले सेभिल्लामा रहदा सन् २०१३ देखि २०१६ सम्म तीन पटक युरोपा लिगको उपाधि जितेका थिए । त्यसअघि उनले फ्रान्समा लिग वान च्याम्पियनसिप, दुई फ्रेन्च कप, दुई फ्रेन्च लिग कप र दुई ट्रफी डी च्याम्पिन्स जितेका छन् ।

उनले सन् २०२० मा भिल्ला रियलको कमान्ड सम्हालेका थिए । उनले सन् २०२०-२१ को सिजनमा म्यानचेस्टर युनाईटेडलाई पराजित गर्दै उपाधि जितेका थिए । 

उनकै नेतृत्वमा स्पेनिस क्लब च्याम्पियन्स लिगको सेमिफाईनलसम्म पुगेको थियो । क्लब समग्रमा लिभरपुलसँग ५–२ को हार ब्यहोरेको थियो ।