अन्तिम बलमा पाकिस्तानलाई भारतले हरायो

काठमाडौं । टी-ट्वान्टी विश्वकपमा पाकिस्तानविरुद्धको खेलमा भारतले रोमाञ्चक जित निकालेको छ ।  

अष्ट्रेलियामा जारी आठौं संस्करणको विश्वकपमा भारतले पाकिस्तानलाई ४ विकेटले हराएको हो । 

पाकिस्तानले दिएको १ सय ६० रनको लक्ष्य भारतले अन्तिम बलमा ६ विकेट गुमाएर पुरा गर्‍याे । भारतका लागि विराट कोहली तथा हार्दिक पाण्ड्याले १ सय १३ रनको साझेदारी गरेका थिए । कोहली ५३ बलमा ८२ रनमा अविजित रहे । हार्दिकले ३७ बलमा ४० रन बनाए । 

पाकिस्तानका लागि हरिस रउफले ४ ओभरमा ३६ रन दिएर २ विकेट लिए । नशिम शाहले ४ ओभरमा २३ रन दिएर १ विकेट लिए । 

टस हारेर पहिले ब्याटिङ गरेको पाकिस्तानले २० ओभरमा ८ विकेट गुमाएर १ सय ५९ रन बनाएको थियो ।पाकिस्तानका कप्तान बाबर आजम आफुले सामना गरेको पहिलो बलमा नै आउट भएका थिए ।

इफ्तिहार अहमद र शान मक्सुदले ७६ रनको साझेदारी गरेर टोलीलाई सम्मानजनक स्कोरमा पुर्याएका थिए । शाहिन शाह अफ्रिदीले ८ बलमा १ छक्का तथा १ चौकाको मद्दतले १६ रन बनाए । 

इफ्तिहारले ३४ बल २ चौका र ४ छक्का खेल्दै ५१ रन बनाएका थिए ।  मक्शुदले ४२ बलमा ५ चौका मद्दतले ५२ रन बनाएका थिए ।

अन्यले दोहोरो अंकमा समेत रन बनाउन सकेनन् ।

भारतका लागि अर्शदिप सिंहले ४ ओभरमा ३२ ओभरमा ३ विकेट लिए । हार्दिक पाण्ड्याले ४ ओभरमा ३० रन दिएर ३ विकेट लिए । भुबनेश्वर कुमारले २ तथा मुहम्मद सामीले १ विकेट लिए ।

जितसँगै भारत समूह दुईको र्शीष स्थानमा रहेको छ । पाकिस्तान भने दोस्रो स्थानमा रहेको छ ।