नवौंमा जुरेको उपराष्ट्रपतिको संजोग

काठमाडौं । २०७६ सालमा लुम्बिनी प्रदेशको नेपालगञ्जमा आठौं राष्ट्रिय खेलकुदको समापन समारोहका प्रमुख अतिथी थिए, उपराष्ट्रपति नन्दबहादुर पुन पासाङ । 

प्राय प्रधानमन्त्रीले समापन गर्ने राष्ट्रिय खेलकुदको समापन समारोहमा मुख्य अतिथी बनेर उपराष्ट्रपति पुन पुगेका थिए । तत्कालिन प्रधानमन्त्री केपी ओली र सदस्य सचिव केशवकुमार विष्टको तितो सम्बन्धका कारण समापन समारोहमा उपराष्ट्रपतिलाई मुख्य अतिथीको रुपमा आमन्त्रण गरिएको थियो । 

समापन कार्यक्रममा उनै उपराष्ट्रपति पुनको उपस्थितिमा सदस्य सचिवले नवौं राष्ट्रिय खेलकुदको झण्डा गण्डकी प्रदेशलाई हस्तान्तरण गरेका थिए । 
त्यसको तीन वर्षपछि गण्डकी प्रदेशमा शुक्रबार नवौं राष्ट्रिय खेलकुदको उद्घाटन भएको छ । कार्यक्रमको प्रमुख अतिथी छन्, उनै उपराष्ट्रपति पुन पासाङ्ग । 

आठौं राष्ट्रिय खेलकुदको समापनमा मुख्य अतिथी बनेर नवौं आयोजनाको झण्डा गण्डकीलाई हस्तान्तरण गरेका उपराष्ट्रपति पुनको कार्यकालमा झण्डा हस्तान्तरण गरेको प्रदेशमा गएर प्रतियोगिता उद्घाटन गर्ने गज्जबको संयोज जुरेको छ । 

नवौं राष्ट्रिय खेलकुदको उद्घाटन राष्ट्रपति विद्यादेवी भण्डारीको हातबाट गर्ने आयोजक राष्ट्रिय खेलकुद परिषद् (राखेप)को तयारी थियो । तर प्रतियोगिताको संघारमा राष्ट्रपति भण्डारी अस्वस्थ भईन् ।

स्वास्थ्यका कारण नवौंको उद्घाटनमा राष्ट्रपति सामेल हुन नसक्ने भएपछि मुख्य अतिथीको रुपमा उपराष्ट्रपति पुनलाई नवौंको उद्घाटन गर्ने अवसर मिलेको हो । 

प्रतियोगिताको समापन प्रधानमन्त्री शेरबहादुर देउवाले गर्ने कार्यक्रम रहेको छ ।